土地蓋電訊 左丁山

電訊公司掌握大量手機用戶嘅私人資料，如把關不慎或與政府合作，「搵人」話都冇咁易。而電訊業素來被視為國家策略性產業，在「緊急時期」，政府隨時會接管，香港好彩咁多年來都相安無事，不過回歸日久，內地國營大企業如中移動、聯通、中電信等開始心思思來港發展，爭奪市場，為國家「睇住吓門口」，是可以理解的。梁先生政府常常掛在口邊：「適度有為」，識做啦，將本來已關閉之門（3G頻譜）強行打開三分一，啲巨型電訊木馬咪能夠攝入嚟囉！
此外還要記得，梁先生用BSD嚇止內地人買樓，推「港人港地」排除內地人在買家之列，再有「限奶令」嚴限內地人來港買奶粉，仲曾經傳出在北京與內地部門商討取消「一日多行」，甚至「一簽多行」㖭，在在與內地人對着幹，於是在政協人大兩會中引起反彈，故此梁先生返到嚟之後，搵發展局宣佈推出啟德兩幅土地招標，屬「港人港地」，都費事開記者招待會咯，只發新聞稿了事，因為唔想報紙大肆報道港人港地，刺激內地情緒吖嘛。由此引申，不顧本地電訊商反對，要拍賣3G頻譜，乃安撫大型央企嘅一個辦法，用練乙錚去年嘅講法，此乃代表內地某些板塊利益。本地電訊商跟又死，唔跟又死，要保住江山，必須出超高價與中移動、中聯通鬥過，唔跟嘅話，眼光光睇住三分一頻譜流失，落在大敵手上。
不過香港人都係關心房屋多過電訊，梁政府只要不斷安排房屋土地消息出籠，冚過3G頻譜拍賣新聞，中移動等「輕舟已過萬重山」，好妥啫！見到嘅啦，先講啟德用地，跟住推天頌苑，隨即宣佈填海，土地房屋消息接踵而來，令人吃不消。一位80後朋友仔問申請天頌苑有冇着數，真係幾難答，如果買樓肯定唔買天頌苑，丟空14年之樓宇，問題多多，入住後就知麻煩，就算你肯用30萬元裝修整過晒，樓上業主唔肯整，入住後天花滴水，樓上原來廁所漏水，大家就會好多爭拗空間，傷神到極，呢啲樓點買得過呀？但若果天頌苑居屋價錢真係夠晒平，合乎自己收入水平，係可以買入嘅低質素樓宇，夠便宜嘅話，仍然有市場嘅啫。