電訊木馬 左丁山

聽完IT專家講電腦、手機安全問題，知道我地根本無真正能力可以抵抗集體侵襲行動，唔通用番最原始嘅方法，飛鴿傳書咩？用新款智能電話好容易被人追蹤、竊聽，避無可避，唔怪得股票Ｋ呢位先進人物講親電話都係用一部舊到極嘅諾基亞，掉在茶餐廳枱面都冇人肯要嗰款，佢仲叫我地快啲買番一部，因為遲啲就可能不再生產㖭。電訊專家Ｐ就認同股票Ｋ之言，專家Ｐ話舊手機講電話夠清晰，電話裏頭冇咁多電子設備，比較難追蹤，唔似得一位警局人員，唔見咗部iPhone報失後，憑內裏裝置就知道部iPhone仍然留在警局內，係自己人偷咗啫。換句話說，你揸住部iPhone就已經自動話俾「別人」聽，你人在何方。
專家Ｐ話香港電訊業發達，手機賬戶多過香港人口，但點大都係七百幾萬人嘅小市場，世界上不入流。咦？唔係噃，政府話拍賣4G頻譜收番近16億元，又話要收回三分之一嘅3G頻譜，重新拍賣，咪又可以搵多啲錢？本地市場雖然細，但有金蛋生呢！專家Ｐ將住宅土地與電訊業對比（3G頻譜拍賣），非常勞氣，佢指出，15年前買入土地，即使今天租約到期，仍然可以續約，最多補地價啫，點會收番三分一土地嚟重新拍賣㗎？據電訊業界話，電訊管理局收到十二份業界意見書，十一份要求保持現狀，只有一份話應將全部3G頻譜重新拍賣，結果政府唔理會大多數意見，要電訊商交回三分一頻譜嚟拍賣。邊一間電訊商獨排眾議呢？有傳說話係中移動。
中移動如果要買3G頻譜，股票Ｋ講，以佢擁有五千億現金嘅實力，香港冇公司夠佢揮，用吓「散紙零頭」已經可以掃低香港所有電訊商。三月二十一日之中移動市值係一萬六千四百六十二億元，在香港經營電訊業嘅長實和黃、新鴻基地產、電盈，再加埋CSL嘅母公司Telstra呢幾間「大集團」嘅市值，都未及中移動咁大，點爭呀？唔怪得啲本地電訊商鬼咁勞氣，講到不惜要申請司法覆核嚟阻止政府向佢地收回三分一3G頻譜拍賣（即係賣俾中移動啫）。電訊專家Ｐ就覺得特區政府似有政治任務，在免費電視發牌上就全力拖延發出新牌照，封殺王維基，在電訊3G頻譜上，就力排眾議，要重新拍賣，明明為中移動開門，他日中移動得到頻譜，如虎添翼，在本港小市場大肆擴張，佔取較大市場分額，已可預卜。