早排傳出傅明憲與莊家彬分手，聽講係男方老豆莊士集團主席莊紹綏，大力反對這段「姊弟戀」，但觀乎傅明憲背景，父母傅奇及石慧皆是電影明星，照計能與莊家起到一脈相承效果；嗱，莊氏祖父輩皆迎娶名氣界女士；阿爺莊重文曾擔任中華廠商聯合會會長，二房貴為工展小姐；至於老豆莊紹綏，人稱「飛仔莊」，早年喺英國讀書時，同殯儀大王蕭明個仔蕭百成friend過打band，風流倜儻，揸住架白色勞斯萊斯泊喺倫敦Playboy Club門口，自認咁多年都無俾人「抄過牌」；其留英同學仔對他的威水史家陣依然記憶猶新；飛仔莊老婆賀碧諭，另有一藝名葉靈芝，係七十年代邵氏明星，作品有《丹麥嬌娃》、《舞衣》等；莊家媳婦名氣十足，照計傅明憲都唔太輸蝕，輸在唔係一手盤啩。
三井住友湧泉相報
三井住友向寶哥哥間東亞注資近七十億元，凌駕西班牙Caixa、新加坡國浩成為單一最大股東；仲講到明唔會增持至19.9%，亦唔會同其他人聯手起東亞，從而維持三分天下嘅均衡局面。出錢而唔要控制權，世間上點解會有咁着數嘅嘢？據中環遺老話，此事講嚟有段古。話說打完仗，三井住友要重返香江，但三年零八個月嘅傷痛記憶猶新，唔係想做就做得到。當時簡Sir簡悅強喺東亞主政，拔刀相助，幫佢哋搞掂。滴水之恩，湧泉相報，係中國嘅傳統美德。日本人識得咁做，禮失求諸野也。只不過簡Sir已矣，家吓東亞係李家打骰，三井住友報恩有冇搞錯對象呢，又？
專人洗底
城中唔少富豪都鍾意打golf同做gym，做完運動成身汗，梗係沖番個涼先返工啦，順便拎埋啲衫俾會所洗，乾手淨腳走人！咪住！仲有條底褲呢？吸收晒日月精華嘅底褲，袋走又麻煩，一陣唔記得拎出嚟洗，將精華提煉多兩三日就唔好啦！不過唔怕！原來全香港有Hong Kong Club同Golf Club呢兩間會所，好貼心咁提供獨家洗底褲服務。你除出嚟，佢就幫你洗！下次來就有乾淨底褲換。呢項服務費用不詳，連網頁都無介紹，可能只有VIP獨享。
本週包攬
幫人補習係佢、寫大學論文係佢、託管小朋友係佢、教日文係佢……吓？就連益壽治病、禪定氣功、易經占卜、指點迷津，都係搵佢！一個人可以包攬咁多生意？佩服佩服！
中環寸嘴
工廈大王楊耀松長子，是各大有名食肆之VIP，喜歡研究已故及城中有錢佬對食之喜好，強調「貴」唔等如識食，自詡分享食經乃是提升讀者之水平。
楊老太也要四季曲奇我最鬼憎人交行貨嘅，就算研究有錢佬食啲乜都研究得好精o架。哈，俾我收到料，原來新地郭老太最鍾意食四季酒店一款Orange Zest Cookies，有橙絲嘅曲奇；既然郭老太有得食，我阿媽楊老太都唔輸蝕，佢在生時買番幾樽俾佢品嘗吓，有啲橙絲老人家啱胃口，無咁滯；同嗰啲Jenny's Cookies落多多膨脹劑，成塊餅輕泡泡，無得比呀。都唔知點解咁多人去排隊買。食餅梗係配靚茶，早排過年啲銀行佬都算識做，向我哋呢啲客仔送吓小禮物，所謂小財唔出大財唔入；J.P. Morgan送嗰款茶夠精細，罐上印咗首詩，叫附庸風雅咁啦，呢款茶叫Dragon Chop，係按照Morgan生前最like嘅茶，由錫蘭伯爵茶再溝中國嘅正山小種；收到呢份禮代表同J.P. Morgan有番咁上下交情，明冇？Barclays巴克萊都唔錯，送咗餅普洱嚟，仲搵個《盛合》載住；呢兩間行都算識做，不過我投資唔會聽啲i-banker老點o架，呢排個市連升九日，有啲友仲叫我加注重鎚，俾我媽到佢狗血淋頭。最近機場三跑嘈嘈閉，張炳良話：三跑空域協議不能公開，聽到都