財爺建議引入美食車，冀給予年輕人多些創業機會，變相叫年輕人做「小販」，其實香港唔少「賓架」，屋企都係做小生意，唔知係咪年幼時落場幫手，耳濡目染下，數口特別精，成為金融界精英。嗱，好似第一信貸老闆冼國林未創業時係永亨老臣子，僆仔時幫屋企手在西營盤街邊賣嘢，專賣皮革及日用品；前高盛私人銀行家郭得勝，屋企賣魚，聽講年輕時在街市叫賣時聲如洪鐘；仲有，出身美資大行嘅阿松，老豆係金菊園嘅燒臘佬，後來升呢做埋掌櫃；嗱，真係唔好睇小做小販呀，嗰啲街頭智慧，勝過讀MBA！湯文亮同攞命陳係波友
最近紀惠集團嘅湯文亮好紅，因為佢講咗句：「三個月內細價樓爆煲！」靈唔靈唔知，不過賭局開完無耐，阿攞命陳就出招收緊細價樓按揭，細價樓成交縮咗唔少。佢哋一個係收租佬，一個係高官，大纜扯唔埋，但原來係波友。湯文亮同小宗講，佢哋年輕時喺南華會健身認識，兩個人健身悶悶哋，就約埋打壁球，大家都有運動底子，好快上手，之後仲喺香港壁球聯賽打到上甲組添！
○七年國泰航空舉辦咗個壁球名人慈善賽，陳德霖出力比賽，湯文亮出錢捐贈，可見二人默契十足。而家攞命陳出招被千夫所指，湯文亮即讚佢其實又快又狠，又話佢係宅心仁厚，只出半招。二人咁合拍，有冇夾埋先？
一皮嘢生日會
三八婦女節當日，工廈小王子楊國佳在順德聯誼會八樓開生日會宴請親朋及好友，平時口沒遮攔嘅小王子，有唔少由小學時已識落的知心友，還有不斷累積上來的霧水契妹。今年幾多歲就別提了，總之仍未「登六」；當日佢笑到見牙唔見眼，因為生日禮物夠創意，包括五磅重嘅「金元寶蛋糕」，以及小學時同坐的同學仔伍威達送上印有英女皇嘅一元紙幣，名副其實嘅「一皮嘢」，仲有支成熟過佢嘅1946年西班牙甜酒；至於壽宴菜式中的蟹王白鴿蛋、鵝掌柚皮至有特色，每圍盛惠一皮嘢。預告：小王子下週將出山繼續「中環寸嘴」，大家冇得食都有得睇。
中文大學江河日下
上期我哋講中大嘅英文，有心人校友睇咗，大搖其頭：「咁搞法，中大呢塊招牌邊仲有得剩吖！兩大國際評級機構其實亦一早將呢個事實公諸於世矣。」佢老哥所講嘅國際評級，其一係美國嘅QS，另外就係英國嘅Times。前者將中大喺全世界排在46，後者則排129；似乎唔算太差，但睇真啲就唔係咁盞鬼啦，因為兩者都將中大排喺港大——同埋科大——之後。前者將港大排28位，係亞洲之冠，名次高出東京大學（第31位）及新加坡南洋理工（39位）。港大喺Times嘅排名較低，只居43位；但中大就更慘，跌出百名之外，係排129位。呢位老哥講，阿瑟王主政之時，廣納賢良，中大排名一度高過港大。但自從劉遵義、沈祖堯相繼出掌校政，中大嘅排名就江河日下矣。沈校長揚言唔志在排名高低。然則排名準則按教學及學術研究水準而定。唔理排名，沈校長係咪話教學同研究都唔使理呢？兩者皆空，咁大學仲有冇得剩呢？身為護法，香大俠冇得唔出聲o架噃！
踢竇浸大星級學生飯堂
去大學飯堂食lunch，大家一定心諗：「仲唔係去食頹飯？」一般學生飯堂最平十蚊一個飯，唔係白飯，有餸o架喎！不過今次試嘅，係名廚Ricky（張錦祥）喺浸會大學新開的Bistro Bon。Ricky曾經係灣仔萬麗海景酒店Scala的行政總廚，係now電視節目《煮角》嘅台柱。Ricky佢今次膽粗粗，將其以往開嘅私房菜Le Mieux Bistro六位大廚帶過來浸大，竟然開一間學生飯堂賣私房菜！Bistro Bon位於浸大吳多泰博士國際中心地下，一打開門，嘩！開放式廚房、落地玻璃、雲石枱，唔通去錯地方？小宗出番去望一望招牌，確定無錯先入去。一份香辣烤雞午市賣六十八元，呢個價可以食到成個星期頹飯。不過侍應話一到lunch time學生便逼爆全場。咁貴都爆？小宗一試就知物超所值，咬落又嫩又滑，仲以為入咗酒店食雞。晚市仲有西班牙黑毛豬，有咬口之餘又冇渣，盛惠一百六十五元。如果掛住Ricky以前嘅煎鴨肝、烤羊架，可以早幾日訂定私房菜一試，小宗啲老友試過，話食過翻尋味！
金牙大狀講嘢食碗面，反碗底
林振強筆下「厚嘴唇的女人」，瑪麗亞‧譚惠珠醒香港人，話中國正在崛起，但有啲人唔知道已經改咗黃曆，仲抱住港英時代嘅優越感，咁嘅諗法愈來愈不實際云云。其他人咁講，冇問題；瑪麗亞咁講，認真唔妥。瑪麗亞今日靠乜坐喺人民大會堂向香港人指指點點？你估係靠佢老豆交低大把的士牌俾過佢吖？梗係唔係啦。瑪麗亞得以上位，完全、絕對、肯肯定係靠港英俾佢行政、立法、市政同地區四料議員嘅身份。若非呢個特殊地位，八叔睄佢一眼都嫌多過頭啦，係咪？靠港英嘅賜予得以上位，家吓就掉轉頭鬧香港人恃住有港英賦予嘅優越感，唔實際。此又豈非學得吳楚帆話齋，食碗面，反碗底？