2015-02-26 NM
敝刊上期爆特首梁振英搵劉鳴煒捐四億銀俾瑞典卡羅琳醫學院，咁啱自己個仔梁傳昕在該校做研究。中環人都討論有乜後着，事關富豪捐錢點會「死錯人」。最經典是九五年合和主席胡應湘豪捐一億美金予母校普林斯頓大學，後來被《華爾街日報》踢爆，原來普林斯頓大學基金嘅投資公司揸咗合和接近4%股份，仲係哥頓向大學基金投資公司推薦旗下股票，成件事本來雙贏之局，哥頓做大慈善家之餘，基金佬見普林斯頓大學基金都揸住合和，增添名牌效應。只是人算不如天算，一個金融風暴掩至，合和在泰國投資損失慘重，股價跌到四腳朝天，拖累大學基金有所損失，不過哥頓承諾大學的捐款並無縮沙，且分期奉上，至○七年完成一億美元捐款，前後足足十二年，可謂馬拉松式慈善家。踢竇童軍總會飲啖茶
今次踢嘅竇，係位於九龍公園隔籬嘅佐敦童軍總會，成幢嘢好似商業大樓，但原來八樓經過一堆辦公室後，會見到有間酒樓叫「金陶軒」。呢度表面上只招待會員，限制住人流，又無咁雜。但點解係表面上？因為打電話訂位時，佢會問你會員number，不過你用小小藉口都過到骨。例如話：「我老友都係童軍嚟o架！」接待員雖然好理性咁解釋：「童軍唔一定係會員。」但最終都俾入，並要用現金找數，生意會員制形同虛設。
個個星期飲茶，唔係蝦餃就燒賣，真係食到厭。呢度好處係除咗點心，午市有唔少特色名菜。小宗叫咗個黃金年糕蝦球，價錢唔平，要$168，但夠晒大碟，起碼四個人先食得晒，鹹蛋黃同年糕嘅味道出奇地夾，年糕炒得幾爽口，另一味脆汁牛坑腩亦夠惹味。仲有招牌菜脆皮椰子雞，攞過飲食大獎，不過要預早訂，小宗今次就同隻雞無緣喇。順便一提，童軍總會不時有唔少興趣班，飲完茶再去玩吓，咁又一日囉。
唐人有飛士
大陸經濟放緩，入口原材料大跌，累到加紙貶值。不過，咁反而凸顯唐人今時唔同往日嘅身份同地位。何以見得？年卅晚大除夕，加拿大總理哈栢不遠千里由渥太華去到溫哥華列治文之時代廣場出席羊年倒數。據商場老闆譚馬士．馮講，加拿大史上未試過有總理到私人商場慶祝唐人新年，哈栢撥冗光臨，係破天荒第一趟。何止係唐人有飛士，馮老闆又何嘗唔係飛士十足？不過咁都仲未夠噃，除咗總理，溫哥華所在之BC省省長、時代廣場所在之列治文市市長通通齊齊參與倒數活動，直情賓虛咁嘅場面。乜嘢叫做飛士？各位，咁就係叫做有飛士啦。
中！股壇長毛發新年財
股壇長毛David Webb，多年來都有個Christmas pick嘅習慣，呢幾年雖然無咗，但唔代表無「尾胡」食喎。去年八月，佢因為hold住鱷魚恤（122）多過五個巴仙而被曝光，本刊問佢原因，佢話鍾意呢隻股資產折讓大。嗱，唔夠半年，已經有回報。過年前鱷魚恤發通告，話有獨立第三方想買大股東林建名手上五成股權，呢個新買家仲落三千萬元訂睇盤數。跟住鱷魚恤嘅股價就被熱炒咯，一開市已經爆升五成，午市之後仲開turbo升近九成，創上市新高添！林生搞呢間公司咁耐，都未試過咁風光。不過林生風光，都唔及David Webb好眼光！佢入貨時只係$0.4，股價本週一最高升至$1.1。David Webb賬面已賺三千二百多萬元，真係笑住過肥年！佢回覆小宗話，隻股嘅有形資產淨值，約為每股一元六角，其中絕大部分來自投資物業；而投資者亦要留意交易成事的機會只是一半半。鱷魚恤小股東收到冇？
金牙大狀講嘢民望高錫煙民
鬍鬚曾未公布預算案，增加煙稅之說已甚囂塵上，吸煙與健康委員會更加話加到每包一百蚊以上，班煙民先至會覺得入肉，收到促進戒煙之效。反之，食衞局長民望高則出榜安民，話即使加煙稅亦會考慮市民承擔能力云云。此民望高之所以民望高也。按理加唔加煙稅由鬍鬚曾話事，幾時輪到民望高出聲？即使出聲，食衞局嘅職責乃在促進市民之健康，好應同吸煙與健康委員會統一口徑，寓禁於徵，一於加稅加到班煙民怕怕為止。民望高捨此而不由，反而掉轉頭安慰班煙民，話即使加都會錫住佢哋嚟加，好似慌死佢哋食唔起煙咁嘅款，莫非食煙唔係政府宣傳咁講，會危及健康？民望誠可貴，但係唔係可貴到不惜將之建築喺煙民嘅黑肺之上呢，民望高？