一向廣結四方好友嘅肥馬馬時亨，近日曝光率高，政界一直盛傳佢要為「馬拉松」（為梁錦松鋪排做特首）做好熱身。早幾個星期，佢就吹雞咗好幾場傳媒飯局，搵啲傳媒高層傾吓偈。
嗱，早兩星期，有人就喺銅鑼灣一間富豪成日去嘅酒家樓下，見到兩部靚車泊咗喺度；其中一部Bentley，屬馬時亨家人所有，另一部勞斯萊斯，屬東方報業集團嘅馬家。當晚九時多，先見到馬時亨一支箭咁標出酒家，撲上車即刻閂門走人。十數分鐘後，輪到《東方日報》老闆馬澄坤，喺多名保鑣護送下走出來。此兩位除咗都係姓馬、同姓三分親外，原來都係廣東潮陽人。上月馬澄坤才以富豪團身份訪京，在傳媒界又有影響力；馬時亨要「馬拉松」（或者松拉馬），都係時候要走訪城中名人咯！
富豪為龍躉「分手」
永安國際（289）執董郭志一，早幾年變身「賣魚佬」養龍躉，在米埔及流浮山設立養殖基地，一一年仲拉埋思捷環球前主席邢李㷧（米高英），投資五千萬入股其養魚公司「亞洲水產」，成為第二大股東。有呢條超級水喉射住，郭志一嘅龍躉自然更加生猛，米高英更在老家海南島設立龍躉魚苗場。兩位富豪本來因龍躉老友鬼鬼，但小宗聽聞，由於龍躉場一直未有錢賺，米高英本想投資一、兩億做大股東。但郭志一花唔少心機在龍躉場，唔想無話事權，對米高英的投資金額原銀奉還。根據公司註冊處資料，現時由郭志一、退休總督察陳少華等人出任董事的「亞洲水產養殖科技」，一一年由一家外地公司等持股，一年後已轉讓予其他公司，由始至終睇唔到邢李㷧有持股。郭志一曾形容，有邢李㷧如「強心針」，希望養龍躉不只是生意，更希望將科研成果回饋大自然，拯救瀕臨絕種深海魚。不過咁喎，無得話事，邊有人無啦啦俾錢你舞，呢個世界係咁現實o架啦！
本週吔爆谷
本週日，有人見到689同阿女齊昕、以及齊昕嘅母親（對鞋無掉轉著噃！），漫步白石角海濱，之後四點鐘轉場數碼港睇戲。有讀者傳來一張689喺戲院內、印印腳吔爆谷嘅相片。佢睇嘅《星際啟示錄》（Interstellar），故事大綱如下：人類已難以在地球生存，有探險家為救地球，遠征太空尋找星際生存空間；佢哋為人類理想，甘願犧牲自己……。而CY，就係食住爆谷，睇吓班探險家點死。
東瀛遊上市未出發先興奮
對香港人來講，人民幣升值都不及日圓貶值吸引！近排円又再跌，食正概念嘅東瀛遊，仲唔乘機招股咩！招股價介乎1.3至1.48元，入場費近三千大元，唔少散戶都話抽。翻開其初步招股文件顯示，截至6月底，集團上半年收入為7.72億元，按年上升6.48%；但純利只得3,191.7萬元，即係利潤率得4%，仲要按年下跌9.21%，少咗啲噃！而且受累於日本增加消費稅，以及多國政局動盪影響旅遊意慾，截至今年九月三十日止三個月，客戶人數按年減少8.8%至9.5萬人，集團預計全年純利會少過上年三成。東瀛遊目前喺香港無任何物業，十一個營業地點都係租嘅，今年上半年租金成本便達到$1,100萬。一路都有話，東瀛遊執董禤國全，拍板喺日本掃咗好多物業同基金股票，部分仲升晒值，不過就唔見有放埋入上市公司。幾時都話，無上市嗰啲，先係正嘢呀！
本週圖片
住好啲。係咪佢嘅夢想？
金牙大狀講嘢一人一票非民主
《人民日報》話習大大帶奧巴馬夜遊瀛台，此舉有極其深層次象徵符號意義，事關「康熙曾在瀛台研究制定平定內亂、收復台灣的方略」。與此同時習大大更向老美灌輸民主思想，「民主未必僅體現在一人一票直選上」。此又豈非鬼拍後尾枕乎？鬼唔知咩，先經千二人篩選，驗明正身愛國愛港喇先至到香港人一人一票去選特首，任得你點睇，都冇可能稱得上係民主嘅喎。自從啟動政改程序以來，北京一直話以最大嘅誠意俾香港喺二○一七舉行一人一票直選特首。好啦，習大大卒之向老美和盤托出，一人一票直選唔係民主嚟o架，咁循序漸進實現民主嘅承諾又點先？