2013-02-07 NM
本刊上期報導「揭亨得利（3389）五大疑點」一出街，上週三亨得利股價即逆市插水，單日跌咗一成三。中環人報料指，不少外資行「賓架」都即刻走去便利店買書。亨得利亦不敢怠慢，當晚即刻更新公司網站上嘅店鋪名單，將被本刊踢爆已「消失」的分店剔除。
報導有「回響」，不枉小記個多月來的努力。其實編輯去年底和fund佬食飯，已收到風，覺得亨得利有疑點，馬上叫小記「開file」。第一步當然係「刨」年報，同時四出搵鐘錶界老行尊刮料，由知名大行老闆，到小記幫襯過買錶嘅街鋪，都唔放過。調查零售股，除耳聽四方，仲要用「腳」去睇。亨得利最大市場在中國，但是有超過三百幾間鋪，分布逾一百個城市，無可能逐間睇。最後部署係，揀最旺及較偏遠嘅店去睇，另外安排同事在香港打電話，於營業時間內，逐一致電有提供電話的分店。於是，小記立即執包袱起行，睇完上海、北京，再一路南下河南新鄉、焦作，根據河南省官方網頁，這兩個城市是省內GDP排名較低的城市。然後飛往出名窮的貴州，先到省會貴陽，再搭四小時火車去六盤水市。萬事俱備，正好本月中亨得利宣布再向市場抽水三億五千萬美元，用來「債冚債」，timing夾到正，報導順勢出街。巧合嘅係，第二日，三間外資大行即罕有地「大合奏」，出報告為亨得利「解畫」，有兩間更給予「買入」評級，矛頭衝着本刊而來。信邊個？股民自行決定。其實，《壹仔》花咁多心機去做「踢爆」，唔係想同外資投行「唱反調」，最終目的只係揭露上市公司真面目！（黃捷）