LV用八億港紙入股人龍店翡翠拉麵小籠包，好多人都覺得好奇怪。骻 未夠！原來，LV今年三月亦有接洽富豪飯堂福臨門，表示有興趣投資入股。據知LV就係睇中福臨門今年又攞「2014亞洲五十最佳餐廳」，更由四十八位升呢至十九位，希望藉住福臨門同翡翠拉麵個品牌走入亞洲餐飲市場。呢單刁，神女有心，襄王有夢，現階段LV就希望福臨門可以先開多幾間分店，早前已傳出福臨門今年年中會喺澳門賭場開設分店，兩者可謂合作在望。
好多中環人都發揮創意，諗緊雙方有乜協同效應，喺LV包包上印上小籠包？食飽魚送包包？仲可以整番鮑魚小籠 包。骻 LVMH原本就係法國葡萄酒及奢侈品製造商，當中LV（Louis Vuitton）係皮革製造商，而MH（Moët Hennessy）係酒品生產商，兩者喺八七年合併，不過多年嚟LV包包嘅人氣都勁過酒。其實LV去年已經擊敗Prada，收購意大利咖啡店老字號Cova，打算喺餐飲界大展拳腳，到時齊齊賣LV旗下名酒，對LV生意當然有利；而福臨門同翡翠拉麵，又可以利用LV嘅國際網絡，將品牌帶到全世界。
職場秘笈不要亂轉工
港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。上一次我寫了一些香港年輕人的拚搏例子，希望各年輕人得到啟示！公司投資於你身上，就要有回報，因此你是要幫公司賺錢和解決問題，而不是提出或製造問題！年輕人不要動不動轉工，因為每轉一次新工，你就要從零開始，重新和新團隊建立關係，爭取新上司的信任，你在舊公司所做的一切，都等於白費。在新公司，你每做一次決策，都要清楚瞭解你的提議或決策是並沒有違反公司的思維或生意原則，磨合時期，戰戰兢兢，做事只會事倍功半，相反，在舊公司，你已熟習所有一切，做事得心應手，所以年輕人若因為少少加薪及不滿公司的點點滴滴而跳槽，實非明智。很多時打工仔因老闆太嚴厲而轉工，須知道老闆就等於你學功夫的師傅，他對你愈嚴厲，你的功夫就愈好，不然的話，日子久了，你就淪為一個二三流的角色，高不成，低不就。所以對你有嚴格要求的上司，才能幫助你真正成長！有些朋友看完我寫的文章，善意批評說我有部分言論偏幫公司，但平心而論，我只是以我過去多年打工經驗，寫出自己認為要真正上位的方法與途徑，希望年輕人不要行白路或以為有捷徑。因職場在99%情況下都是多勞多得，不勞而獲的幾乎絕無僅有！我最近看了兩則小故事，想和大家分享及思考。（一）一年輕人去見工，老闆問「你有什麼優點？」年輕人：「我是一個思想積極、自信及樂觀的人。」老闆：「可否舉例？」年輕人：「請問若我明天返工，公司準備好未？」真人真事，而年輕人亦真的被聘用。（二）老闆叫下屬向佛學大師賣梳，第一個伙記心想：「大師都冇頭髮，上司分明為難我，我做下去有何意思？」於是憤而辭職。第二個伙記向大師說：「你買十把梳，擺在佛寺，善心人因在戶外參拜神廟後，可能頭髮被大風吹亂，那些梳可以幫善眾整理儀容。」大師聽後，幫他買了十把梳。隔了一段日子，他又向大師說：「大師，你佛學高深，你可以將你買的梳開光及簽上大師的名字。」大師說：「為何？」那伙記說：「這些梳因有佛力罩身，買回家後，可保家宅安寧，小孩快高長大，成人事業順景，老人身體健康。」大師聽後，說：「幾錢？」伙記說：「我只賣十元一把，但梳被大師開光及簽名後，價錢則可大大提高，而大師賣給善眾也不用定價，由善眾自己決定給多少。」大師聽後，幫那伙記買了一千把梳。
錢果豐花名「傻仔錢」
高鐵嚴重超支兼延期交貨，本週一港鐵（66）主席錢果豐喺立法會回應指今次是溝通問題，令港鐵員工努力得不到認同，十分「過意唔去」。他的一番言論，認真令市民眼火爆。骻 連他的書友仔也忍唔住重提佢花名，質疑佢嘅能力。錢果豐當年喺赤柱聖士提反書院讀書兼寄宿，花名叫「傻仔錢」。話說當年的富二代難教的話，父母就會送到該校寄宿，學習一下紀律，他於七八年喺美國賓夕凡尼亞大學讀完博士，返香港到有「糧油大王」之稱嘅外父黃大樁旗下的南順集團打理生意，可惜錢果豐唔太識做管理，南順系公司先後喺九六年出現虧損，九七年他亦「被辭職」。不過「傻人有傻福」，他九八年被羅致入港鐵做非執董，○三年取代蘇澤光做埋主席，一做就做咗十一年。錢果豐有份做非執董嘅華潤電力（836）近來又捲入打貪風暴之中；最近高鐵事件搞到「一鑊粥」。呢啲係咪叫路遙知馬力呢？
萬洲上市「撻Q」三宗罪
全中國最大嘅豬肉商萬洲（288），本來上星期掛牌，但到最後一刻竟然宣佈擱置上市大計。究竟衰乜？第一宗罪，自大。萬洲管理層大想頭，用勁高估值上市，集資四百億，嚇窒班基金經理，但你睇嚇個市？最後割至百五億都上唔到市。第二宗罪，自私。想抽水還債，但又慷慨派息俾股東，一二年就派咗七億，令好多投資者睇唔過眼。高盛子公司、新加坡淡馬錫，溫家寶兒子溫雲松創立嘅新天域資本同埋鼎暉投資等拋售合共七億幾舊股，擺明攞錢，綁半年做嚇樣都唔肯。雖然最終「縮沙」，但市場都唔受落。第三宗罪，自欺欺人。萬洲搵咗二十九間iBank幫手搞上市，陣容龐大，睇落好勁。但其實太多行家爭飯食，要將佣金分成廿九份，根本冇肉食，賓架不約而同放軟手腳。有傳萬洲決定等到下半年出嘅一四年業績，做靚盤數再上市。不過，班高層最緊要睇嚇個市，唔好再著「皇帝的新衣」。
金牙大狀講嘢鬍鬚曾指住和尚罵禿驢
鬍鬚曾撈過界，學人講政改；話初時見到班人撐到行曬，仲以為此乃「討價還價的談判伎倆」，到尾大家都會「作出合理的妥協」。睇清楚，至發覺極端嘅立場唔係「用來討價還價，而是已下定決心寸步不讓，甚至有了拉倒的準備」。鬍鬚曾嘅矛頭似係指向泛民，但睇真啲又唔似噃。班友連三軌方案是否缺一不可都冇共識，此又何來寸步不讓嘅立場可言？咁乜誰至係真正誓不妥協？登登登櫈，咪係人大委員長張德江囉。佢話到明「一個立場」同「三個符合」——要根據《基本法》循序漸進地發展民主、普選行政長官制度要符合香港的實際情況、符合《基本法》的規定、符合愛國愛港標準——係「法律底線、政治底線」。既為底線，即係冇得傾啦，請問咁又似唔似「有了拉倒的準備」呢？莫非鬍鬚曾係指住班泛民鬧老細？會唔會咁高吖？
中環人語迷你版