2014-04-10 NM
上週五，馬會庫務部總監曾翀（音：充）喺外電訪問中爆響口，話馬會首次直接投資落兩家美資對沖基金，仲一買就十億美金。出名「有米」嘅馬會，係亞洲最具規模嘅機構投資者之一，以前作風都係穩健為上，只會投資風險較低嘅「Fund of Funds」（組合基金），但因為呢類基金要俾雙重管理費，所以馬會索性自己下海釣大魚。
今次馬會CEO應家柏打破馬會保守傳統，不過，小宗老友睇到其所選兩間美資對沖基金大名，即刻嚇一驚。呢兩間以紐約為基地嘅基金，分別係Och-Ziff Capital Management Group LLC和Millennium Management LLC，管理資產分別約四百三十億美元和二百二十億美元。先講Och-Ziff，最近可以話係華爾街「紅人」。先係因為未有合併貸款抵押債券（CLO），上個月俾證監會「點名」，要求重列財務報表；更大鑊係，司法部懷疑利比亞獨裁者卡達菲係基金投資者之一，上月開始調查Och-Ziff，令基金股價跌足一個月。
至於Millennium，「成名」更早。○五年，因進行虛假交易，被美國證監會罰款一億八千萬美元，是近十年第二高的罰款。馬會庫務部總監曾翀話，已經做足盡職審查，但兩間對沖基金咁「猛料」，佢無理由唔知o架？
職場秘笈你同老闆計份糧，點唔同？
港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。各位打工仔，你們是否常埋怨工作時間長、薪金低，覺得公司對你唔住？我現在做一個簡單數學，讓你們對以前的看法改觀。以一個中級職員計，一年有10天大假，14天紅色假期（2014年計），大部分打工仔不用返六及日，一年就有104天假，病假當一年四天，黑色暴雨及風暴一年約3天，聖誕前夕、大除夕、冬至或中秋節，許多公司放早，加起來又一天，剩下返工日子就只有229天。一天工作由朝9晚6:30計，就有9.5小時，但扣除午飯、遲到、上廁所等等，只有8小時，而工作效率假設有88%（已經很高）則每天剩下7小時。229×7 / 365×24 = 1603/8760 = 18%也即是說，你每年只用18%時間幫公司做嘢，但攞足全年人工，是否很超值？（哈哈！）但當然，打工仔條數又有另一種計法。打工仔認為雖然是月薪出糧，但實際上應以時薪計，以一天9.5小時工作，實際上還未計上班、下班的交通時間，未計放工後還掛住工作的時間，未計星期一返工的心理憂鬱的賠償，未計因開會而入不切或放不切股票的損失，未計上司無理取鬧的容忍費，未計其他同事疏懶失職而要自己補上去完成工作的額外費等等。認真計計，可能剩回的自己私人時間也是18%，這就是老闆與伙記在人工上的不同見解了。（哈哈！）補白最近聽到一公司高層對職位的新詮釋，形容抵死及某程度上也頗貼切，節錄如下：1. 總裁：總是在裁人2. 總監：總是監視人3. 老闆：老是板著臉4. 經理：經常無道理5. 秘書：總是讓老總秘密舒服
孫柏文等女「包」去睇騷
孫柏文牙擦擦喺《盛女愛作戰》節目拋書包，話好欣賞啲女仔去聽TED騷，由此TED個app爆紅，TED（Technology, Entertainment, Design）的講者精英雲集，TED會議剛於溫哥華舉行完畢，每張飛盛惠七千五百美元（折合成六皮港銀），不過唔係捨得買飛就可入場，事前不單要面試，還要呈上個人網頁做presentation。今年孫柏文補充話，如果條女出埋飛，出埋機票去睇TED騷，就直頭可以同佢結婚兼開埋聯名戶口，咁睇，孫柏文未有機會接觸TED騷喎，計小宗話，特區政府應該諗嚇橋如何吸引TED來香港搞talk，好過下下要阿爺施捨，一唔聽話就收番個APEC財長會議舉辦權，香港人要靠自己先掂嘅！
壹週圖片自製車位
假日唔少香港人鍾意揸車去郊野公園抖嚇氣，鄰近西貢嘅北潭湧郊野公園，一到假日，想搵個車位都好難。有車主就上演一幕「逼上梁山」，睇到都牙煙，唔單只違例泊車，仲有破壞樹木之嫌。dislike！
金牙大狀講嘢金管局和味花紅
金管局宣佈加薪4.65%，另加2.79個月花紅。表面睇，似乎係阿駝行路舂舂嚇。但睇真啲，班官份糧實則認真和味。其他唔好講，就睇佢哋打理嘅三萬億元外匯基金，舊年只賺咗八百一十七億元，回報率得二點七個巴仙。自從金管局喺九四年成立至今，外匯基金之平均回報年年有5.4%，舊年之回報則只及其半。算唔算得標青，睇怕都無須多講矣。以咁嘅業績，有花紅出已經夠奇啦，出花紅仲竟然出到成2.79個月咁多——相當於四分一正薪——問你服未。不過，二點七個巴仙嘅回報，可能低處都仲未算低。舊年佢哋學人發展地產，仲係隔山買牛添，走到去倫敦落注。萬一有乜閃失，你話會點啦。