「我終於可以同太太有個交代。」生蠔店Ocean Three老闆何智聰，抱著五歲的兒子Hayden說。
四年前，Ocean Three是一間在facebook經營的生蠔速遞店。當時連牌照都未有，只能向本地行家拆貨再轉售。一隻來貨$8的生蠔，賣$14，以平價吸客。
四年後的今日，Ocean Three已經有四間分店。由網店變零售鋪，皮費大了，要維持平價生蠔的定位，不再簡單。阿聰度出三招「維穩」入貨價，生蠔愈平，客人才愈多，平均月賺廿萬。
阿聰多年來沒放過一天假，假日都帶著兒子上班。生命無常，他那只有二十六歲的太太，四年多前已因突發性心臟病離世，當時兒子只有一歲。他帶淚做人兩個月，生意加湊仔令他沒時間再傷心，「我係有小小不幸，但我諗通，總不能帶住悲傷做人。」
四年前，Ocean Three開業幾個月，本欄曾訪問過阿聰。報導出街後，客人多了，以為可喜可賀，不過阿聰表示，全港最大的生蠔供應商環球，竟「封殺」他們。他說：「以前係啲貨返唔切，就問環球攞，但我哋生意好咗之後，佢哋好似怕咗我哋，唔肯報價俾我哋，預備好cash去買嘢，都唔肯批貨。」不單前難寸進，還後欄失火。
客人走數 虧蝕百萬
本來Ocean Three有批貨予一間內地餐廳，但對方卻走數，損失近百萬，「以為內地生意好好搵，打個電話一買一賣，就賺十幾萬，點知佢哋唔找數喎，公司蝕咗八十萬人仔。」阿聰的拍檔James仍然深信內地市場龐大，堅持向北發展；但「被搵笨」的阿聰和另一拍檔Jun卻不認同，三人只好分道揚鑣，昔日代表「三劍俠」的Ocean Three，頓變「Ocean Two」。「當時公司剩番四、五十萬儲備，仲要俾十五萬舊partner（James）買番佢啲股份。」其時，Ocean Three的生意模式是，與其他生蠔供應商合作，向外國供應商訂貨後，在機場拆貨，再送到客人府上，並不直接處理生蠔，以避過食物製造等牌照的要求，「嗰時要每日早上五時就出發去機場。」他們以facebook形式經營，每月賺到幾萬元，「你賺到錢，都想啲伙記賺到錢，發展係必須o架。」不過，那次虧損近百萬之後，一切要從頭開始，他與拍檔Jun把每月賺到的錢儲起，兩人各支七千元人工。一一年，他們儲夠錢，在葵青工廠區開了第一間店，亦成功申請牌照。但相比網上經營，要計及租金、人工、燈油火蠟等皮費，要維持平價策略，更需要有「橋」。
第一招「化敵為盟」
Ocean Three生蠔的定價是來貨價的一點四至一點七倍，售價由十多元起，相比city' super、一田等超市三、四十元平得多，阿聰說：「控制損耗率低好緊要！」生蠔只可以維持五至十日，去不到貨便「硬蝕」。除做好冷藏功夫，他更與行家「化敵為盟」。「一星期賣三萬隻蠔，但節日就難預啲。之前個聖誕節，預多咗五、六千隻，都係靠啲同行幫我啃。」而他們亦不時向行家「伸出援手」，打好關係。生蠔批發公司的銷售經理Javis表示：「有次我個酒店客突然話要多啲貨，我哋嘅貨量應付唔到，臨時同阿聰借，仲要叫佢賣平啲，佢竟然一口應承。」阿聰解釋：「都係幫一百、幾十隻，最多一千隻，你幫人人幫你，何樂而不為。」「競爭，就留番喺service層面囉。」Ocean Three開平價開生蠔班，二百多元包教包飲食，明益客人。而且還提供食物有壞包換，及送貨後會致電客人等服務，阿聰得戚地說：「我哋個facebook fans page三萬幾個like，淨係做呢班客，都夠交租喇。」
第二招「先科水 後攞貨」
現時，Ocean Three共有三十多款生蠔出售，除了本地的供應商，阿聰和Jun更飛往法國及澳洲等地找生蠔新供應商。「呢個過程好難o架，搵一個幾乎要用半年時間。」現時其中一個於法國的生蠔供應商，本來一直都拒絕供貨予Ocean Three，「佢話太多生意，做唔曬。」全靠一次「好心有好報」，扭轉局勢。「我有個伯父，唔係有錢人，我結婚時，佢竟做咗五千蚊人情，我一直記喺心，唔知點還。」後來他堂妹（伯父的女兒）想去法國玩，阿聰決定贊助她，但請堂妹順道替他到法國，會見該供應商，「個供應商係荷蘭人，我堂妹個男朋友又係荷蘭人，惺惺相惜，竟然就咁傾成咗。」雖然對方願意供應生蠔是「緣分」加「幸運」，阿聰要維持雙方關係，也要出招討好，而最好的方法就是「先科水、後攞貨」。他笑指做法雖然「老土」，但往往「最work」：「據聞大型超市真係會拖足一百八十日數期，供應商梗係唔鍾意啦。所以我哋信譽好好o架，好多供應商經常主動每隻蠔平一蚊俾我，咁我哋啲貨咪又可以賣平啲囉。」然而，此舉要預留數十至一百萬的流動資金。
第三招「買期貨 鎖成本」
由於以送貨為主，其餘三間分店，阿聰亦可選址租金較平的工廠區；貨品方便，除了生蠔，亦有三文魚、牡丹蝦、皇帝蟹等急凍食品、連肉類、調味料及紅酒等，有約二百類食品，阿聰是想客人在家中開派對時，會想到Ocean Three。為控制毛利，部分貨品會「買期貨」鎖成本，「我哋會預早一年訂購，咁樣個價會比現價低啲。」阿聰指來自澳洲生蠔的價格，近幾年上升不少，「當然有風險，可能明年個市價會低過而家嘅期貨價。但過去幾年，內地需求大，澳紙升值，當地嘅蠔價上升唔少，所以期貨令我哋有效降低成本，賣得比行家平。」阿聰預期，蠔價未來一段時間仍會持續上升。開業至今，阿聰說的確曾加價，「但每隻蠔最多加過一蚊！」為了這盤生意，阿聰已四年無放過假，週日都帶著五歲的兒子Hayden回鋪頭開工，寓工作於湊仔，他說：「有啲人好鍾意打機，我鍾意度橋、做生意。」是為興趣，亦為證明自己。十八歲在地盤做科文的他，想追女仔，「不過個女仔升大學喇，我學歷低，又搵得少錢，點追到人。」他的起心肝半工讀，花了八年才取得學位。其後轉搞ebay生意，錢依然搵唔多，「但終於追到個女仔，一年後，我哋結婚、買樓兼生仔，搞掂曬，嗰年真係好開心。」開心嘅時間，過得特別快。阿聰的太太於兒子一歲時，因突發性心臟病而去世。阿聰心痛回想：「我太太真係一個好人，佢生日我都係同佢去樓下食雲吞麵，佢無怨過我一句。」其他人一直看不起他，成為了他發奮的動力，「至少我想證明俾太太睇，但我唔知佢而家睇唔睇到。我太太係一個肯捱麥記嘅女人，但我以後都唔想我嘅身邊人要再捱麥記。」現時仍單身的阿聰鼻紅紅說。
開業資料
營業資料