上週二黃昏，觀塘街頭人來人往。三個身穿紅、黃、藍色服飾的超人手持傳單，見人就派。途人要合照，亦有求必應。三個超人，其實是從美國留學回來的年輕人Steven、Nick及Reeve，唔知醜扮鬼扮馬，目的只有一個——宣傳他們首創的電召貨車app GOGO VAN。
這個GOGO VAN app，猶如現代版的貨車call台，乘客在app落單，司機在app接單，講多句都慳番。推出至今，已有逾二十萬人次下載，每日處理的交易宗數達五千宗。惟要從傳統電召台搶司機加盟，他們現階段免收傭；上月更斥資廿萬在電視落廣告，以割喉放血模式，搶佔市場。按GOGO VAN上月交易金額二千萬元，估計日後每月可賺八十多萬佣金。不過，有商機就有競爭，隨著多個對手的出現，生意模式及收入，又添上變數。
乘客透過GOGO VAN找貨車，一切配對，由電腦進行。乘客只要在app輸入終點、起點等資料，按確認後，柯打即發至裝有此app的司機。想接柯打的司機就會鬥快按掣接單，手快有手慢無！記者上週五下午一時，在太子曾試用GOGO VAN叫車，接單後不消三十秒，app便會顯示司機的車牌和電話，同時該司機亦來電約實，十五分鐘後已上車。
這個欲取代1083、網上查詢、甚至電召call台的app，由Steven、Nick和Reeve創立；三人於美國留學，分別就讀UC Berkeley（柏克萊加州大學）、USC（南加州大學）和UCLA（加州大學洛杉磯分校），但三人並非富二代，故在當地中餐館兼職，因而認識。「本來我哋夾份做飯盒廣告生意，即係搵人喺飯盒面落廣告，再免費供應俾餐廳，廣告費當收入。但飯盒成本上漲，利潤跌，咪轉做其他生意囉。」結束飯盒生意，三人卻找到另一個商機，「當時每日十點前要送飯盒，遲到實被人剷。朝早打去call台搵貨van，成日冇車。急起上嚟落街搵，點知喺樓下見到啲司機得閒到喺度玩電話，亦肯接我哋生意喎！」他們發現問題在於傳統call台的收費模式，「佢哋同司機收取固定月費近千元，但又規定司機要向客人收取較平的費用。」有司機認為無肉食，寧願自己搵客，市場便出現「有司機找不到客，有客找不到司機」的情況，令他們有了搞call貨van app的想法。
快爭司機割喉放血
開業資金有限，三人拍膊頭找朋友幫手寫app和設計，幾乎零成本，但都要花五個月時間才寫好，GOGO VAN去年七月及十一月分別在Google Play及Apple上架，供免費下載。這段期間，老闆三人走勻全港屋邨停車場派傳單、搵司機。Nick笑說：「我哋朝早就去工廠區派傳單，夜晚就去屋邨停車場搵van仔攝傳單，試過有次朝早喺觀塘派完，夜晚喺天水圍撞番同一個司機，對方都好驚訝我哋咁勤力！我哋app上架嗰陣已經有四至五百個司機登記！」全港約有十一萬輛已領牌的中小型客貨車，要得到這班司機的垂青，關鍵正是收費。GOGO VAN現階段免傭，數個月後收傭亦決定棄用固定收費模式，改為每單交易收取百分之五至八的佣金。不少司機大聲叫好，司機黃先生說：「有錢賺先俾佣金，有乜所謂！Call台有無客都要交錢。」他們亦決定提高每程車費，變相司機佣金出自客人身上。這一場電召貨車革命因GOGO VAN飲了頭啖湯，司機版已累積下載人次達一萬五千，活躍用戶達七千人。
快搶乘客扮鬼扮馬
司機二師弟表示，透過GOGO VAN，一日可接到八至十宗生意，「但要搶單都唔易，柯打一眨眼就冇，電話要夠快，網絡要穩定，如果咁啱去到啲接收差啲嘅位，就無o架喇！」為了確保司機有單，客人亦要夠多，他們斥資廿萬在宣傳易賣廣告。三名老闆更親自扮超人，於廣告中粉墨登場，「其中一個係女超人，我哋要親自去街市買bra扮女人囉。」Reeve尷尬說。他們早前更穿著超人戲服，走落深水埗黃金商場及維園年宵等地宣傳「吸睛」，乘客版共有逾二十萬人次下載。透過GOGO VAN落單，收費由GOGO VAN釐定，普遍會較call台貴百分之五至二十，故他們要加強服務質素，app會廿四小時運作；日間他們請來五名接線生做顧客服務。當有客人取消或重發相同訂單時，接線生就致電查詢。記者試過取消服務，GOGO VAN職員即致電問：「係咪司機有乜問題？」交易完成後，乘客可以為司機評分及留言，遇有投訴者，接線生亦會跟進。Nick解釋：「如果係司機有問題，又屢勸不改，我哋會停佢賽。」另一方面，Steven笑說：「有啲人未識用智能電話，會打上嚟問我哋係咪有車call，我哋都會做埋。」做攝影師的客人Leo說：「Call台六點鐘就收工，有時又call好耐都無車覆，成村人等我啲器材開工，最緊要快，價錢反而係其次。」
面對競爭棋差一著
現時GOGO VAN每日處理的交易約五千宗，上月處理的交易金額達二千萬元。如以佣金百分之五計算，每月營業額可達一百萬。不過收費模式仍未開始，故現時仍屬「燒錢放血」階段。當初，三名老闆合共拿出約兩萬元私己錢，再各自向家人借六萬，又前後向數碼港申請共四十三萬元的資助。直至app上架後，他們才正式向外間投資者敲門，Steven興奮地說：「我之前做聯合國義工計劃個mentor，對我哋做嘅嘢好有興趣，所以決定投資落嚟，仲介紹啲基金俾我哋認識。」他透露，現時GOGO VAN儲備達七位數字彈藥。他們本來預計去年底開始收費，可轉虧為盈，但這時卻殺出個程咬金，「我哋打算個app上架run順咗就收費，點知同類型app如Easy Van、CALL4VAN相繼出現，如果我哋而家收錢，司機可能轉用其他app，我哋決定變陣唔收住！計劃到今年第二季先開始收。」Steven無奈地說。近月來，他們發現「GOGO VAN」商標竟被他人搶先註冊，「係個app嘅投資者提醒我哋要註冊商標先發現。」惟有花錢請律師向知識產權署上訴。「原本我哋好有信心，因為我哋先係GOGO VAN嘅原創者，不過早前TVB成功註冊到『香港電視』個商標之後，我都驚驚哋！」Nick皺眉說。Steven亦指開始感覺到這行龍蛇混雜，「公司之前的電話線試過無故失靈，伺服器也曾受到黑客攻擊。有日成朝電話都冇響過，我哋覺得唔對路，check番先知咋！」他氣憤地說，所以近期公司就算搬了寫字樓，也不敢在門口掛招牌，以免令人容易搵上門，他警惕地表示：「呢行比較複雜！」事實上，自他們出現後，不少傳統電召台也開始加價留司機，一場客貨車界的革命蓄勢待發。但三名老闆對這盤生意仍然樂觀：「我哋幾個月間，已經做到一定規模，只要keep到，就會成功！」
至今，坊間已有五、六個電召貨車app，但部分規模極細。記者曾以顧客身份試用GOGO VAN及其主要對手Easy Van的服務，由於兩者在車資及叫車速度相若，似乎GOGO VAN是首創亦無優勢。
開業資料（07/13）
租 金$10,000 #裝 修$7,000雜 費$5,000總投資$22,000# 兩按一上
營業資料（01/14）
營業額$0 ^租 金$11,000 *人 工$122,000 #虧 損$133,000^處理交易金額約$2千萬，涉15萬宗柯打。以5%佣金計，營業額約有$100萬*曾搬寫字樓#五名全職，連五位老闆人工
一點意見
科技專欄作家尹思哲：個餅好大！「貨車app出現，顛覆咗傳統電召台。人事最難管，用科技取替人力，咁變相可以skip 咗最難處理嘅問題。以往咁多call 台都生存到，相信幾個app要生存都唔難，只有人工成本高、車隊細的公司才易被淘汰。依家係鬥燒錢階段，捱得最耐、最多人用，受到最多關注嗰個就係贏家!做大咗，有牙力，唔用你唔得嗰陣先收錢，依家好多互聯網絡公司嘅策略都係咁。一定要想法綁緊用家忠誠度，將來你收費，佢哋一樣會照俾錢。User base好重要，當app 具一定規模之後，可考慮橫向發展，甚至衝出香港。」