仲有兩個禮拜過年，小宗唔少中環老友都忙住辦年貨。拜年唔少得買禮盒，上個禮拜五朝早，小宗經過中上環，醒起永和街有間Jenny Bakery，諗住過去買幾盒曲奇，點知未見到鋪頭，離遠望，已嚇親！望吓手錶，十一點未到，龍尾已去到中遠大廈。粗略估計，超過三百人！當中大部分係拖住喼嘅自由行。
如此奇景，不少外國遊客都眼望望。唔單只要排隊，仲限購，每人最多買五盒。小宗唔死心，再去佢哋尖沙咀分店睇，點知又中伏，人龍由麼地道排到出彌敦道，大部分都係強國人。現場居然有內地人即場向途人兜售戰利品，其中一款原價一百零五蚊嘅曲奇，叫價二百蚊，仲話：「一個鐘人工都要三十五蚊，你排五個鐘幾錢啊？」
曲奇買唔成，小宗唯有轉戰北角德成號買蛋卷。點知去到門口，已經見到個「額滿」嘅牌，連隊都無得排。老闆仲話，中秋節嗰時已經接晒聖誕新年嘅訂單，呢排都唔做零售，叫小宗年初七再來排隊。當日，有班日本遊客一樣撲空，大嗌：「Very disappointed.」
有錢都買唔到，咁，就有商機啦！銅鑼灣糖街嘅商場仔The Point，有三間專賣Jenny曲奇及德成號蛋卷嘅水貨店。大家標價都好狼死，一罐正價六十幾蚊嘅蛋卷，賣到成二百蚊！其中一間嘅老闆Danny仲牙擦擦咁話：「有咁多人排即係有商機，啲曲奇最貴我哋賣到三百蚊盒。」蛋卷都有水貨，又係多得一班強國人。香港人唔易做，搶奶粉、搶床位、搶入學申請表，依家連曲奇蛋卷都要搶，唉！
壹計就明波司登盈警前已大走樣
本欄找來有二十多年經驗的資深會計師林智遠及鄔碩晉，每期踢爆一間上市公司的會計陷阱，股民入市前睇清睇楚，一計就明。上星期有21間上市公司發盈利預警，當中不乏服裝銷售公司。但要看盈警才洞悉公司業績變化，是否太遲？看中期業績是否能早人一步？就看波司登（3998）的中期業績，經營溢利下跌19％，比收入9％的跌幅還要多，原因是分銷和行政開支分別上升5％及18％。管理層解釋行政開支上升，是由於增加員工薪酬及福利費用所致。但在收入及經營溢利皆下跌下，是否必要大幅增加行政人員薪酬及福利？更嚴重的，是上半年收入28億元人民幣（下同），但中期年結應收賬卻超過28.5億元，對比去年中期年結24.1億元，上升18％，應收賬周轉天數由去年年中的143日，上升至今年186日。應收賬周轉天數上升，相信是催谷營業額的結果，但營業額最終還是下跌！此外，上半年中期年結存貨27億元，對比去年中期年結22.8億元，上升18％，但上半年銷售成本才14億元，存貨周轉天數從去年年中的249日，急升至今年348日。換言之，存貨足以銷售接近一年！波司登以銷售製造羽絨為主，故有季節性因素，下半年應有較高銷售額，但存貨上升而可能引起的陳舊或積壓，最終或會增加存貨撥備；而應收賬上升可能引起的呆壞賬，亦會同時使壞賬撥備增加；再加上，收入及經營溢利下跌等數據和分析，我們還須等待公司盈利預警，才能預知公司已走樣嗎？（林智遠）
土豪金的完美演繹
上週一輛林寶堅尼現身中環，一身「土豪金」，燦到大家開唔到眼！喺強國，仲有好多估你唔到嘅「土豪金」完美演繹。
金牙大狀講嘢殼后丁母憂此情永在
「殼后」朱李月華嘅媽媽李馬少芳早前去世，享年八十五歲，星期日於香港殯儀館設靈。當日傍晚，不少政商界名人現身。出身金魚缸嘅朱太，有唔少老友，除咗詹培忠，仲見到蕭若元父子同第一財務嘅冼國林。前醫管局主席胡定旭，以及專責「打黑」嘅廉政專員白韞六，都有來慰問。朱太爸爸李樹福係澳門賭廳揸弗人，就係人都知，相反朱太媽媽就低調得多。話說佢生前有碧瑤灣嘅豪宅唔住，寧願自己搬返去老家鴨脷洲，閒時最鍾意同班舊街坊打牌。過去十年，佢擁有一百六十間公司嘅股票，相信都係幫個囡揸住。出名孝順嘅朱太，幾乎逢週五晚都返去同媽媽食飯。李家喺鴨脷洲可以話無人不識，除咗有兩座金利豐大廈，朱太仲做埋街坊會理事長，年年都為長者街坊搞盆菜宴。雖然朱太媽媽已離開，但此情永在。
詩姑教英文
二○一七選特首，阿爺要篩過，驗明正身，愛國、愛港、唔會同中央對抗，至俾參選。故此代阿爺驗身之提名委員會由乜誰組成、其工作是否要包括剝光豬睇全相，至為關鍵。喬曉陽話過，提名委員會之組成「可參照」由四個界別一千兩百人之特首選舉委員會。官方將「可參照」譯成may be formed with reference to。阿董之律政司梁愛詩教大家may即係must，故此「可參照」者，係要跟足四個界別、一千兩百人咁解。照詩姑嘅英文，《聖經‧民數記》之名句：「願 耶 和 華 賜 福 給 你 ，保 護 你 。」（「May the LORD bless you and keep you.」）豈非變成向耶和華落柯打，要佢一定要賜福俾你，保護你？詩姑根正苗紅係無神論者，莫非佢真係以為耶和華都要聽佢老點？May be.