周顯，要怎樣界定他身份？他在《新報》寫社論，在《蘋果日報》、《am730》、《明報》、《東周刊》等報刊講股票、寫財經，出過書講梁振英，但又會爆富豪秘聞。私人事他不多談，只知讀過中大新聞系，但無畢業。三年前寫了武俠小說《碳六十之劍》，講述一個基佬和一個太監一同練功的「愛情故事」。小說被倪匡讚極好看，一炮而紅；他的意念來自：「閹咗嘅雞會大隻啲，咁閹咗嘅人都應該會好打啲！」但他最廣為人知的，還是炒股。去年在《爽報》的投資比賽「爽組合」勝出，贏走九十萬元；他寫的那本《炒股密碼》，由○七年至今，已第十一度再版，最新版本叫「白金完全珍藏版」。他謙稱炒股不叻，但收風最強，「要自己再分析。貼士幾準嘅人最終都會戙你！我唔怪人。我道行未夠啫！」周顯已步入無敵無友的境界，這就是他圈中的「生存之道」。我的收料秘技
周顯每日三餐是他「收料」的時間，福臨門、國福樓、翠亨邨等，都是他的竇，食飯兼陪朋友鋤弟。他自認炒股不叻但收料叻，消息靈通加以篩選分析，就是賺錢契機。這天一來，他就將三部舊式Nokia黑白機擱在枱上，其中一部電話配上了太空卡。他說自己用不慣沒有按扭的智能電話，堅持用瀕臨絕種的Nokia。電話不能上網，不能看股價，但無所謂，最緊要「收到料」。
記：記者周：周顯 記：你主要向邊啲人收料？周：做呢行嘅人。我身邊好多朋友，上市公司主席、經紀、律師、三教九流、黑社會呀！股票經紀啲料會準啲，上市公司主席啲料，唔準o架！佢哋有利益衝突，有誘因老點你！叫你瞓身買嘅，通常叫遲咗，因為佢要落車喇嘛。記：人哋點解要俾料你？多唔多俾人跣？周：我都會俾番料人，A俾我啲料，我可以俾番B。係一場交易，我都有貢獻！而家一日聽十隻八隻，日日都有人跣你。呢個社會充滿陷阱，你帶錢出街，都有好多人想打劫你！我無所謂嘅，輸咗係我道行不夠啫，唔係俾料嘅人有問題。（有無試過俾錯料，人哋同你反面？）有，但好少，因為我通常先做「免責聲明」。記：你點分邊啲堅、邊啲流？周：睇吓幕後邊個係老闆，間公司有乜資產、盈利、股票歸咗邊未、當唔當炒、個古仔似唔似啦。如果公司賬目話你知間公司係五，你有好多可能性，可以係一加四、二加三、十減五，但唔會係二加四。你同我講古仔話「二加四等於五」，即係你幻想出來，希望係咁，我一聽就知你呃我。
記：幾時上車幾時落車？周：每次情況唔同，要配合市況、公司形勢等。喺股票上有太多unknown，無絕對性，只有可能性。例如你好有把握隻股聽日升，點知庄家今日飲醉咗，唔知醒無炒到，過兩日先炒番，咁已經係unknown啦！唔係所有嘢都on schedule，試過好多年前，有經紀叫我買164（中國伽瑪），佢十居九準，我即刻落盤，落完盤佢再打來，要我即刻放。我沽完，股價已跌返原位。十秒我贏咗三十萬，到而家都唔知點解！嗰市就係咁玩。記：互相收料外，你喺呢個圈有無真正朋友？周：有共同語言就係朋友，呢個圈嘅共同語言就係八卦嘢。想有朋友，有三樣嘢：第一你真心對人好；第二你有經濟效益；第三你有娛樂效益，好interesting。必須做到呢三點，最好就有一、兩點，唔係你唔會有朋友。我其實好多朋友，但因為太過無效益，我唔得閒見。舊同學呀、好好感情嘅朋友，應該見！（你又得閒見咁多女性朋友？）第一，女人梗係有效益，flirt吓都好呀！記者又係有效益。但同學係無效益，我諗臨瓜前先慢慢見番啦！
我的炒股分析
講求經濟效益的周顯，去年參與《爽報》（已停刊）的投資比賽「爽組合」，憑一隻931（宏通集團），贏了其他對手，獲得九十萬元獎金。鏡頭前他平淡地說得獎無感覺，贏的錢好少。鏡頭後卻興奮得兩日間將獎金使掉大半。他向來懂得為自己的「人物性格」定位，轉數快，表達力亦強。正如他印了十一版的《炒股密碼》第一章——投資者須知自己身在何處，又打算從投資得到什麼。
記：散戶應以什麼心態捉貼士及炒股？周：散戶要知報紙無可能一寫即升。你必須知，第一，炒股目的。係想聽日沽，定一年後沽？如果你想一年先沽，根本唔使日日睇專欄捉貼士。你日日睇，梗係想日日炒啦！其實報紙專欄貼士，係self-fulfilling prophecy（自我實現預言）。嗰期邊個紅就當炒，孫柏文呢期紅就隻隻得！（孫近日一注貼中金寶通（320））點解？佢紅就寫咩都有人跟，有人跟咪升囉！尤其細價股，易炒上。跟紅頂白無錯o架啦！記：你認為股市係假？周：股票梗係人為，你睇窩輪就知啦！供應創造需求，簡單講水清無魚，必須要人為先有股市。不過只要搵到錢，你理得佢真定假！我最近抽一千萬股中華包裝（1439），最後中咗二十萬股。我係見佢老闆自己揸晒，靜雞雞聖誕節上市，一個廣告都唔賣，好低調，估佢得。新股就係炒供求，佢上市嘅目的為咗圈錢，唔係送錢俾你使。如果係老闆、個庄自己揸晒，咁點升都得，貨源少就炒得起囉！（訪問後數天中華包裝上市，首日最多升超過八成。）記：你睇得最中係邊隻股？周：ESPRIT（330）。當初我係第一個唱衰佢嘅！佢七十幾蚊時，我唱佢跌落五蚊，到佢跌落十蚊時，我掉番轉頭唱好！買咗到而家十五個幾未放。我覺得佢跌過龍，當時佐丹奴市值一百一十億，ESPRIT一百七十億，佢個brand點都好過佐丹奴啩？記：你炒股有無座右銘？周：好多人炒股票有一個盲點，佢哋認為呢個世界上，股票係有formula的，即係一加一要等於二，凡A則B，係錯嘅！我嘅座右銘咪無嘢係凡A則B囉，一定有變數。
我的過去
周顯很大使，自言每個月使六位數字購物。訪問時穿着的一件Loewe大褸，要七萬元！但他寧租樓亦不買樓，身家成謎。他出身小康，但家道中落，曾於中文大學新聞系讀書，坊間指他曾替蕭若元打工，寫稿度橋，後來從蕭身上學懂炒股技巧，自立門戶。由於愛寫作，他多年前曾寫過多本武俠小說，其後寫財經書及專欄，深受散戶歡迎。
記：你的出身？周：以前阿爺有錢，喺澳門有樓收租。不過當年佢為咗澳門嗰幢可以收多五十蚊租，放棄揀香港天樂里嗰幢囉！跟住阿爸爛賭，賭馬、炒股、過大海，咩都啱，最後輸晒。（你曾讀過中大新聞系？）畢唔到業，唔講。之後第一份工做公關（邊隻？），我都想做「嗰隻」！記：點諗到兩個武俠小說男主角搞基？周：我諗嗰種劍法，好難練。一隻閹咗嘅雞會大隻啲，同樣閹咗嘅人會好打啲！我用科學解釋荒唐理論。記：嚟緊仲有咩構思？周：我想出本《國富論》，研究日皇明仁係咪裕仁嘅仔，仲有講吓楚漢相爭時期嘅政治鬥爭等。而家我夜晚一點瞓，朝早九點起身寫稿，每日用三個鐘頭寫晒。你哋稿費微薄（指「壹週Plus」專欄），要合乎經濟效益，我用十分鐘寫完。下午同人食飯打牌，差唔多收市返屋企睇股票。記：你搵夠錢了嗎？周：我好大使！從來無咁諗。我周身名牌，我承認我係名牌奴隸。（睇唔出）吓？呢件褸係Loro Piana，四皮嘢，呢對鞋係BV，四千蚊！最平係條褲，7For All Mankind。我唔鍾意炒股，但我需要炒股搵返來嘅錢，咁我唯有不斷炒落去！