香港人愛炒股，過去一年，恒指爆出數隻「股王」，帶頭的濠賭股銀河娛樂（27）及科網股騰訊（700），均累升超過一倍，而且勢頭繼續強勁，加上近月狂炒的細價股、殼股，帶挈不少小股東發達。
要在兇險的股市中淘寶，殊不容易。多番追尋下，本刊在這班贏家當中，找到三位隱世「街坊股神」，講述他們的獨門炒股秘笈。當中有住在土瓜灣的配藥員，狂買二百隻股票，自製基金，總值達八百多萬；亦有已退休的旺角波鞋街老闆，「等得忍得」，十萬變出千六萬；而屬進攻型的過氣廠佬，一注獨贏買騰訊，總市值逾三億。綜觀去年交到功課的基金，普遍增長只是一成；這班街坊股神，已贏開巷。土瓜灣基金經理
四十多歲的雷敏謙，個子不高，彬彬有禮，一身街坊裝毫不起眼，但一提起股票，即專家上身。在公立醫院任職配藥員達二十年的他，現時持有二百多隻股票，市值超過八百萬元，而且，所有股票都是實名登記持有的。這天，相約在他農圃道屋企的會所拍照，雷敏謙捧着一個大袋子出現，從中拿出一疊超過一呎厚的股票紙，風騷道：「我帶咗副身家出嚟！」他對每張股票紙的排序及擺放位置十分熟悉，記者提起哪隻股，他兩三下手勢，就能從紙堆中抽出來，拍照完再小心翼翼地放回原處。
視股如妻
雷敏謙與股票的緣分，由八九年開始，當時他在銀行任文職，專做物業按揭，有餘錢便學家人買股票，愈買愈愛，愈愛愈買！唯當時收入不高，所買有限，直到○一年才持續買入。他自製的「基金組合」，股票數目比一般基金組合多幾倍，藉此分散風險。二百多隻股票中，雷敏謙的最愛，分別是他口中的「大婆」恒生（11）、「二奶」中銀香港（2388）、「三奶」渣打（2888）及「四奶」友邦保險（1299）。「銀行股多數有高息，提供到穩定嘅現金流，再用來買其他股票。」雷敏謙老婆是同醫院的藥劑師，月入十多萬元，加上雷敏謙月入四萬；他每月以至少五萬元，購入上述四個「情人」，至今市值已逾二百萬。去年銀行股不當旺，這些「情人」暫時靠邊站，但雷敏謙一樣扑中幾隻股王有錢收，如騰訊、金山（3888）﹑銀娛及新濠（200）等。其中，○八年在六十多元價位買入的四手騰訊，現價已近五百元，單是去年已讓他獲利逾十萬元，而在一一年，每股十多元買入的兩手銀娛，現價已升至七十八元。
買股先查家宅
對雷敏謙來說，股票就是他的全盤興趣及心血；眼前的任何數字，在他眼中都可幻化為股票代號。有次他在採訪車上大談股票心得，剛巧有架車牌1299的的士超前，他即道：「嗱，好似隻1299（友邦）咁，我睇好佢o架，前途無限，一手都係八千蚊，唔算貴，我成日都推薦年輕人買！」可能要有這股熱情，才能從股市這賭局中爭取勝算。雷敏謙每日都睇實股市新聞，包括財經花邊。還要每逢星期一，五點便起床，在上班前翻出家中過去一週數份報紙，將所有財經版再看一次，確保不會走漏眼，錯失任何消息。而平日，他最大興趣便是發掘「新歡」。先在股價走勢圖中，找出連續多星期出現綠色箭嘴（代表股價上升）的股票，放入觀察名單。扑槌前，必先「查家宅」，包括看招股書、年報，甚至股東名冊，「唔理係股價或公司數據，都要睇三年，一年太短，有機會係造出來。」他的股票全用實名登記，因他從不短炒。「我好長情，見到嫲嫲長揸九倉、滙豐，契婆揸和黃，到依家都可以安享晚年。投機者多數焦頭爛額，而且，我得閒又可以拎啲股票出來欣賞吓呢！」
扑中高價收購
搏收購或私有化，亦是他另一個搵銀「領域」；他曾以每股三元買入一萬股會德豐地產，股價長期在五元左右徘徊，結果一○年時，公司以每股十三元私有化，雷敏謙賺到十萬元。他手上曾持有並已被私有化的股票，還有邵氏兄弟、中信嘉華、駿威汽車、富邦銀行、小肥羊、阿里巴巴等，每次可賺到約一成半到六成利潤。雷敏謙頭頭是道說：「我話你聽，收購比私有化賺更多，因為私有化係由孤寒嘅大股東出手，收購係由第三者提出，志在必得。」他得意地逐一數出手上已被收購股票，包括永隆、道亨、網通等，還有快將賣得出的創興銀行（1111），「我估東亞（23）都好快嫁得出（被收購），你睇佢哋第三代日日風花雪月，無心戀戰，遲早賣！」手頭貨多，雷敏謙自然亦有失手時。他曾持有電盈（8）的前身香港電訊，○○年供股時再加碼，但後來股價愈跌愈有，翌年他即斬纜賣出大部分股份，「剩低一千股（電盈），留作警惕，提醒自己帶眼識股。」根據雷敏謙的記錄，二百四十六隻股票中，有一百六十三隻賺錢，六十三隻跌穿買入價，暫時「贏面」近七成，雷敏謙對此相當從容：「我鍾意德國股神嘅一句話：『一百場仗入面可能有四十九場輸，但餘下嘅五十一場勝利，你就贏咗。』」
相信終會升番
本刊找來東驥基金管理董事總經理龐寶林品評雷敏謙的策略，他表示：「佢揸咁多隻股票，好處係分散風險，而且○一年係低位，係開始買入的好時機。不過我覺得每樣嘢都係cycle，高位賣、低位買，先可以將回報最大化，佢買咗咁多年都冇放，有啲股可能經歷咗兩個cycle喇。」而雷要睇足二百多隻股票，除非如他般是「股票痴」，否則極費心神。不過，街坊股神，各施各法，未計他賣股套現買樓，他的股票組合至今已升值超過一倍，跑贏坊間不少基金經理。現時雷敏謙與太太及兒子，住在農圃道十八號過千呎單位，「佢（老婆）一早講明，要我喺個仔小學前，換到一間至少一千呎嘅單位。」雷笑說。○六年以六百二十萬買入單位，為了不做「樓奴」，他忍痛賣股票，套現三百二十萬，如今該樓已升值至千多萬元；加上持有的股票，雷的身家達二千萬。作為一個穩打穩紮的股票迷，雷敏謙的心得就是堅持：「沙士之後，個市低迷咗幾年，我都迷惘過。但我相信股票，相信股票會升番，所以堅持繼續買。」這幾年獲利甚豐，更加深了他的信念，「我依家擁有嘅嘢全部都係自己搵返嚟。我覺得年輕人唔好心急，只要睇啱時機，好快就有你嘅第一桶金。」
旺角「畢菲特」
湛淦樞，名副其實的隱形富豪。根據股東名冊，他持有約二百手銀娛，如今市值超過一千六百萬元，但他的登記地址，只是旺角窩打老道的單幢舊樓。記者找上門，湛淦樞原來已八十歲，精神甚好，他走出門口接受訪問，對自己幾時買中「股王」，竟然毫無印象：「銀娛呀！我好早就買，當年仲叫嘉華建材（銀娛前身），五毫子買嘅！揸住十幾年，都唔記得幾時買囉。」按其買入股價，應是九八年，即已揸了十六年。湛淦樞續道：「當年買，唔係因為呂志和呢嗰名，而係睇好做建築生意嘅公司，尤其係嘉華，做好多渠務管道嘅生意。經濟好唔好，都要整渠修渠，咪揀佢囉！」退休前，湛淦樞在旺角波鞋街經營波鞋及運動服生意，他笑指當年的生意只夠餬口：「做啲生意仔，賺得唔多，淨係銀娛股票已賺得多過我盤生意啦！」事實上，他的十萬本錢，如今市值已爆升一百六十倍，可謂「一股發達」。
好股揸過世
對於「扑中」銀娛這隻「金蛋」，他表示完全出乎意料，「當年（○五年）放個賭牌入去，我都懷疑過做賭場得唔得，好在諗住再睇吓，先冇賣走股票。之後見大陸放咁多遊客去澳門，就知道賭場實有得做！」果然，近年銀娛股價愈升愈有，近日直衝八十元大關，湛先生認為股價仍未算高：「之前好多股評家話升到五十，之後就話六十，依家都七十啦，你話之後會唔會再升？我就話會啦，一百蚊都唔出奇。」但他就叫散戶不好高追：「一旦大陸減少遊客，賭場一定出事。」對湛淦樞來說，升跌都沒有影響，因為他已決定「揸過世」，亦沒想過套現分給子女，他激動地說：「我啲仔女讀完大學，個個都有正當職業，唔使我操心。我鍾意人自力更生嘅！」中氣十足的他，更突然大罵政府：「依家社會係比較困難啲，政府又做唔到嘢，由曾蔭權到梁振英，都唔係做嘢嘅！政府應該鼓勵市民自力更生，唔係養大佢哋，好似最近啲新移民都可以攞綜援，你話香港點算？」
不要現金長揸股鋪
衣著樸素的湛淦樞，言談間指自己「無乜錢」，但翻查資料，他目前持有四項物業，包括兩個住宅及旺角兩個地鋪，市值超過三億元。而且一如畢菲特，他信奉價值投資，一揸便揸到尾。○八年，市建局在波鞋街收鋪重建，湛伯曾擔任「波鞋街關注組」副主席，抗衡市建局的重建計劃。但最後亦要面對現實，同年十一月，以逾九千萬，向市建局出售持貨逾廿五年的花園街地鋪連閣樓，勁賺六千八百多萬元。翌年，他即於西洋菜南街，以一億五千萬，買入另一地鋪。寧將錢放入股票及鋪位長揸，皆因他不信現金，「人民幣不斷升值，將來一蚊港紙兌五毫人民幣（五算）都會發生，到時香港人點生存？」沙士時，經濟衰退，他認為是港幣與美元脫鈎的最佳時機，便曾寫信予財政司司長曾俊華。湛淦樞展示當年的信件副本，表示：「嗱，你睇吓，我寫住建議港幣應該要改成同一籃子貨幣掛鈎，曾俊華都有回信，不過佢只係話多謝市民嘅建議，高官係咁o架啦，點會認真覆你？」大家要為身家保值，似乎信湛淦樞好過信特區政府了！
赤柱廠佬變股神
做電子生意的張程光，○八年以天價一千六百五十萬元，投得「18」號車牌，名揚一時。去年，他再度在媒體上曝光，全因一隻股票—騰訊。「騰訊絕對係我最鍾意嘅股票。嚿年係二百二十三蚊時開始買，冇幾耐就升到二百五，我就賣咗，之後升到二百七，又再買，但佢愈升愈有喎，好快升到三百，我就知道呢隻股票不得了！之後就不停入貨。」張程光一輪嘴道。根據股東名冊，現時，他實名持有六十八萬股騰訊，市值三億三千萬。
長揸短炒同時玩
張程光指，他買股票一定大手入貨，每次掃入至少一萬至二萬股，而且一定要打電話透過經紀落「柯打」，「自己上網買賣，一萬落錯咗十萬咪好大鑊！」他認為騰訊今年上半年仍有得升，每股一定過五百元，其後只要股價跌穿五百元便一定入貨，「我睇好科網股，因為依家周圍都有人用WeChat，佢所有客戶有幾億人，而且仲有得增長。你睇twitter冇乜收入，股價都係咁升，騰訊有基本業務有盈利，點會跌呀？」去年，濠賭股表現亦超標，但張沒有沾手，「賭股好受大陸影響，一陣有唔知邊個出嚟講嘢，大陸放少啲人落嚟，仲邊有咁多收入？」他指騰訊已有穩定的用戶群，即使內地政策出現變化，亦不會影響其業務。他預計，騰訊未來半年仍會上升，每月升十元，直到六月為止，之後就要看阿里巴巴能否成功上市，帶來另一高潮。現時，除了實名登記的股份外，他亦很享受每日炒騰訊波幅：「如果有心臟病，承受唔到壓力就唔好買騰訊啦，因為佢一日波幅可能都有十幾蚊。」除了騰訊，看好科網股的他，同時亦持有金山軟件（3888）。
睇好港交所
豐盛融資資產管理董事黃國英，認同張程光的做法：「我做法同佢有少少似。就係同一隻股，持有一半，另一半拎嚟炒上落，不過呢樣嘢又要小心啲，放咗要識搵番位入，唔好因為一時的水位而錯失咗個大浪。」張程光是資深「股友」，自然識計數。曾經是港交所（388）十大股東之一的他，現時持有一百萬股港交所，市值逾億元，並指該股現時抵買：「之前我喺二百蚊價位沽晒批股票，近期又買番少少，其實李小加（港交所行政總裁）做唔做到嘢都冇所謂，因為港交所始終會有新股上市，會有交投，業務點都有保證。香港政府揸住批貨都蝕緊錢啦，所以依家百二、百三蚊係幾平嘅。」年近七十歲、家住赤柱獨立屋的張程光，每週仍堅持駕車回東莞及廣西廠房。他認為要親力親為，才可做榜樣及為員工打氣，「依家做廠係好困難，好多廠家話唔退落嚟，係保住班員工，但我覺得係廢話！做唔住咪執，我依家返工當做運動。」張指如果子女不接手，就找外人去管，但行內精英買少見少，前景並不看好。「東莞間廠遲啲都諗住唔做啦，因為我間廠係市內唯一攞到電鍍牌嘅公司，但個牌就嚟到期，睇情況好似續唔到了。」事實上，講起股票便生猛起來的張程光，已一早在金魚缸找到他的「第二春」。
猴子也跑贏基金
基金經理花盡心思，希望在股市中淘寶獲利，但原來有時人算不如天算，連猴子隨意擲出飛鏢來選股，分分鐘也較坊間的投資組合，回報更高。美國普林斯頓大學（Princeton University）教授Burton Malkiel曾於1973年在著作中表示，由蒙眼猴向財經報紙投擲飛鏢而命中的股票組合，與一名專業基金經理的組合回報一致。就這個議題，有研究公司多年以來模擬猴子擲飛鏢，製作出一百款組合，結果在一九六四到二○一○年間，每年平均有九十八款組合跑贏大市。《華爾街日報》也在十多年前做過類似實驗，以工作人員代替猴子擲鏢，挑戰專業投資顧問，結果一百次挑戰裡，擲鏢法勝出三十九次，雖然挑戰未能成功，但已證明精心策劃未必勝得過隨意門。