每個開市日，都有一眾財演，在電視或收音機內，為心大心細的股民分憂釋疑，一同經歷起跌，受歡迎程度不下於一眾明星姐仔。去年六月，特刊《財演舞台》一欄，請來十個最為人熟悉的財演，推介股份。半年過去，是時候公開成績表。為令賽果更公平，本刊將他們去年六月時，在其他專欄推介的股票，都一併計算在內，以推介股份的數目、平均升幅及命中率為準則。最後，再請來在是次「跑馬仔」中表現最好的頭三名「騎師」，為各粉絲推介二○一四年心水股。各位觀眾，開跑！賽果分析
青姐和柏文BB分別在平均升幅及命中率部分，取得最高分，但是他們都只推介兩隻股票。若計及推介股票數量，郭Sir、陸叔及鄧聲興的平均成績最好。
第一名：陳永陸
「今年恒指首季會先低後高，農曆新年之後，資金回籠，會逐步上升，最高到24,500點；第二季恒指會下挫，守喺23,000點。但我睇好國指升幅，估計會到12,500點，因為新年後，三中全會嘅決定好多都會落實，利好中資股。從板塊來睇，大型藍籌股同環保股可看高一線。和黃（13）或會分拆屈臣氏等業務，股價可望升至一百二十五蚊。復星（656）亦具分拆概念，因為旗下業務多元化，發展成熟。而且復星喺自貿區有好多地，可受惠自貿區嘅發展，業務穩中見進取，目標價八元。」
第二名：郭思治
「上半年係樂觀嘅，就算美國量化寬鬆貨幣政策開始退市，都只係減少買一百億嘅美債，對市場資金流影響不大。恒指第一季見26,000點，第二季會整固，喺24,000至27,000點之間上落。選股可以從內需同財政政策入手，例如房屋建設係剛性需求；汽車亦係一個選擇，中央好睇重，因為汽車拉住四十幾個下游行業。個股我揀中人壽（2628）及和黃（13）。預計A股會好，中人壽會受惠喺A股嘅投資，而且回歸合理水平仍有一段距離；和黃旗下有電訊、港口同零售等業務，每個資產嘅估值相當高，未來會陸續分拆上市，每次分拆都可望帶動股價。」
第三名：鄧聲興
「股市第一季會偏好。美國雖然退市，但經濟數據顯示復甦加快，而且只係減少買債金額，唔影響現存嘅市場資金。第二季會少少似舊年嘅情況，擔心進一步退市嘅影響加大。預期恒指首季會上到25,000至26,000點，第二季跌落21,000至23,000點。揀股可以從國策入手，選擇同福利、醫療同金融改革有關嘅公司。我推介銀河（27）以及康健（3886）。銀河今年推出金都娛樂場項目，有新財源，可以推動股價到一百元。另外，國家要將私營醫療服務做大，康健就食到呢個概念。」
東麟（8120）累街坊
有一隻股票十分「厲害」，令兩位財演齊齊中伏，就是沈振盈和鄧聲興去年六月推介的東麟。該公司是○一年在創業板上市的民企，生產及分銷飼料產品，亦有畜牧及相關業務。過去半年，該股大跌超過七成。沈大師解畫：「買創業板股票都係短線投機，通常搏升幾倍，風險在所難免。」鄧聲興就解釋得較清楚：「東麟嘅業務食正農業概念，所以我當時先推介，冇諗到主席不斷將股票賣走，之後直情將公司轉手。不過而家市值同負債都低，相信有後着，但唔知何年何月何日反彈。」
黑馬幫：貴精不貴多
大部分財演都好勤力，如黃德几，一個月推介三十五隻股票，記者計到眼凸。但亦有貴精不貴多的，如孫柏文及胡孟青。出名愛玩一注獨贏的柏文BB，六月份獨推珠管（1938）同御彩（555），半年來都錄得四成多嘅升幅，他風騷道：「揀細股要啱timing，佢哋嗰時資產淨值高但股價殘，好抵。而且我嗰陣時戒咗酒，諗嘢清晰好多，所以奉勸各位，炒股唔好飲酒！」踏入一四年，柏文BB少有地不推介細價股：「而家市況不明朗，我會揀數碼通（315），佢基本因素比較好。」另外，青姐就靠勵駿（1680）跑出，上市至今，已升了兩、三倍。「當時見到勵駿嘅人事同中資背景好強，奇怪市場點解睇唔起佢，所以將自己睇到嘅嘢寫出來。」今次，她推介的是信達（1359），「而家好多股票都升咗，好難推，買信達起碼唔死得人。」