2013-12-12 NM
本刊財經組上期報導全港炒Bitcoin狂潮，文中一眾師奶阿哥，炒個不亦樂乎，個個有錢賺。上週四的鋤書會上，有同事問：「究竟有無啲蝕錢case呢？」
唔，一講完，就有。鋤書會後，有同事匯報：「Grace已經買咗粒Bitcoin啦！」Grace是財經組剛入職三個多月的記者，亦是今次寫Bitcoin狂潮的主筆。她說上週二埋稿後，已心思思想入市，上週四終忍不住，以一萬元買了一點二五粒Bitcoin。她還download了Bitcoin Wallet的app，在手機上日睇夜睇。她道出掃貨原因：「本來我都覺得Bitcoin是造出來炒賣的工具，但訪問完建材師奶Daisy及收Bitcoin當學費的古箏老師後，覺得這玩意幾普及；如果Bitcoin已建立了一定地位，跌極都不會變垃圾吧？」
不過新手無運行；佢入市同日下午，人民銀行就宣布打擊Bitcoin，Bitcoin價曾一度大冧五成，Grace賬面蝕了五千蚊！而像Grace這類做古仔「過度投入」嘅case，過往都有發生，有賺有蝕。今年初金價回軟，同事Isis趁到金行訪問嘅空檔，「順手」買了一粒金，搏金價反彈；怎料近日金價狂跌，Isis這粒金蝕了她千多元。Grace及Isis，異口同聲說會「長期持有」手頭的蝕本貨（答案一如所料！）Grace更說：「我無後悔買，只是後悔無遲兩日買！到第時回升，就賺少咗了！」希望屆時不是做一個記者買Bitcoin蝕入肉的個案，祝君好運！（區嘉儀）