2013-09-19 NM
大劉同羅傑承涉嫌行賄歐文龍嘅貪污案仍在澳門審理，澳門司法界已唱通街，就係話羅傑承同大劉雙雙入罪，結果就為之圓滿；如羅入罪大劉無罪，檢察院一定會上訴；嘩，咁講法咪即係要煮大劉一鑊甘！聽聞大劉「嗅」到不對路，故臨時換帥，轉由高大衞（David Azevedo Gomes）及雷文娜（Manuela Antonio）出任代表律師。其實，唔少香港生意佬都知成件事來龍去脈。
涉案呢幾幅地皮，原本嘉華呂志和好有興趣，仲搵埋廖本懷個仔Philip Liao（廖宜康）間則樓設計畫則，但聽聞批地條款十分之「辣」，啃唔起。至○四年，歐文龍時為運輸工務司司長，決定以邀請招標方式競投，四太梁安琪都獲邀入標，最後由羅傑承的Moon Ocean起氹仔呢五幅地，並由大劉借出八億銀予Moon Ocean買地，卒之喺前年三月，大劉嘅上市公司華置再買起Moon Ocean餘下三成股份，作價十六億！無獨有偶，一一年四月澳門實施打擊炒樓印花稅，但華置依然無有怕，並且不惜工本以豪宅打造「御海‧南灣」，推出時賣個滿堂紅，呎價是七、八千元，成個項目起碼為華置帶來三百億盈利。只不過，喺香港，執到筍貨會被譽為「撈底王」，喺澳門就手尾長；賣樓後個多月隨即爆出大劉涉歐文龍巨貪案，小宗估計，喺葡京贏錢後都要俾啲茶錢荷官，但有人堅決say no，無理到「Macau style」囉！聽講大劉出事後，已有中間人向他傳話，謂只要肯將塊地以「成本價再賺少少」回吐，就包無罪。已經到口嘅肥豬肉變成雞肋，我係大劉都say no，只不過咁去No人哋，塊地咪俾政府收回囉。
