呢篇用廣東話寫，純粹想9吹下
2012，太懶，無學其他blogger寫返篇回顧。又，因為太懶，我無確實自己今年回報有幾多。
2012年恆指升了22％，咁我就算無計都一定驘呢個數。我尐買賣技術系好差，高追低沽時有發生，總之，信唔信都好，我下面有長篇講過既股票我今年都有持有，除左1938一早清左⋯⋯而在股市飛昇前，我誤打誤撞將倉位推高至9成以上，兼長期維持，令我食中曬第四季個浪。原因系因為大部份成員都好生性，根本就無乜點樣震走我，咁我自然就坐定定等食糊，咁又咁好彩佢又爆畀我睇。
81，3899，196，全部都是強股，我都未算識於微時，但跟機已經好和味。
我唔系亦都唔想認叻，因為我只系比平常人上得多網，好股都系從一班超級高手睇返黎。我選擇左跟風，尐股真系強到我自己無可能有呢個回報。（加上我竟開始在今年有勇氣鳩炒，放膽買，肯食糊，平均計一定跑驘大市。）
邊個系高手需要自己發掘，我好感激佢地，我沾一沾佢地既氣已經勁到咁，如果加埋佢地本人既操作，實在不敢想像會有咩回報。
呢個世界總有高低，我唔會只會睇心目中既高手講既野，因為你接受程度唔夠高，你唔夠開放，就算超級高手就在眼前，你都只會有眼不識泰山。
總結全年，我獲得超過我能力所達既回報，原因系我跟得好。
但我唔會放棄研究股票，我只不過一邊從跟風，搭住順風車，一邊學習，一邊研究。
唔好將自己睇得太勁，咁做只會令你失去好多超強分析，因為你都唔信人。堅料都被你當流料。
今年實在炒多左好多，止蝕止賺比已經爽快好多，知道大市好，更開始做到「不理性」，垃圾都買（但千股就不要沾手了，正常唔好玩都咁偏都唔會遇到，睇湯財個網都可以略知佢既「千度」有幾重），總之爆就買，輸就即剪，乾淨利落，反正都知道自己炒緊垃圾，斬得更爽手。
呢排應該好多人話早知唔好咁理性，應該買落去或買大尐。其實股齡有返咁上下既人，都唔系未遇過呢個景況，亦都唔系唔知呢尐光景可以玩幾耐，就系唔敢去炒。
做到貨如輪轉，就百戰不殆。最怕無靈感去不斷發掘下一隻股票，咁樣就要靠一顆開明既心，努力收風。再鍛鍊自己既分析眼光，從當中揀出最強。
再次多謝呢班帶挈我進帳不少既高手，你地無條件分享，真系有錢都買唔到。
網絡世界就系咁神奇，有人覺得只系有班人網上吹水，我就真系跟跟下搵到兩餐。我只可以講你未試過就唔好咁武斷，甚至你連欣賞既功力、品味都未夠班。