2013-08-08 NM
梁朝偉、吳彥祖一早講咗放假一年唔接戲；周潤發、甄子丹、劉德華又唔係個個請得起；因為如此，郭富城、劉青雲、張家輝、余文樂呢一層片酬唔過千，就算未孭到內地票房，都一樣拍到手軟！
至於有大陸票房證明，仲收緊千二萬嘅古天樂，農曆年打後至今，由《毒戰》、《逃出生天》、《掃毒》、《竊聽3》，同期拍緊嘅就有《曼珠莎華》、《單身男女2》，片約陸續有嚟，無他，老闆認為佢屬於抵用嗰隻。上個禮拜，幫完寰宇嘅《逃出生天》做宣傳，過兩日又蒲頭做東亞嘅《單身男女2》開鏡禮，簡直此起彼落！
《單身2》由古仔同內地女星高圓圓冧庄，冇咗放假吳彥祖，加入仔仔周渝民同楊千嬅，中港台齊晒人。東亞娛樂開戲，老闆林建岳一定蒲頭主持拜神大局。初次同杜琪峯、韋家輝合作嘅楊千嬅，當日亦收起大笑姑婆作風，不過把口就無收，竟然膽粗粗話自己仲未俾杜導鬧過。
杜琪峯喺片場會上晒身，但佢少鬧演員，係少，唔係冇！八珍勸千嬅，搏唔過！