香港駕駛學院教車師傅練國，在學院工作廿四年，因不滿教車牌照分成「學院牌」及「個人牌」，令學院教車師傅不能私人教授，在本年初憤而絕食。練國是香港撒瑪利亞防止自殺會資深義工，卻在七月十八日凌晨於元朗駕駛學院內駁死氣喉入車自殺，幸被看更發現獲救。
兩日後，他在立法會發言時激動暈倒。
六月中，運輸署寄信俾我，話決定檢討個人牌發牌制度，仍然唔提學院牌。我呢種學院牌師傅唔可以喺學院外教車，連我個仔學車，我都無得教，要由徒弟出馬。我愈諗愈抑鬱，為咗爭取統一牌照，我試過絕食、暈低，係未試過死，所以我決定以死控訴。
我做咗防止自殺會義工廿五年，聽過好多自殺不遂的個案，就係未聽過駁死氣喉死唔去的，所以揀呢樣。
阿妹好少揸車，借咗架車俾我，泊喺學院出面。本來想喺嗰度死，貼埋遺書喺擋風玻璃，點知部車太耐無開，撻唔着。再諗吓，係駕駛學院逼我，應該死喺入面。揀咗一架學院車，駁好喉，好快就無知覺。明明計劃周詳，買膠喉、問看更巡場路線、搵閉路電視死角，樣樣做齊，點知都係俾看更發現。如果個看更無咁勤力，我應該去咗。
咁都死唔去，真係奇迹。喺醫院醒番，老婆攬住我喊，問：「你有無諗過我哋？」我聽到覺得好內疚。我哋一家關係好好，兩個仔都好乖，細仔升中六仲成日攬住我，而我竟然走去自殺，真係好錯。
我自殺，唔係因為經濟問題，我五十九歲，就算拎到個人牌都教唔得幾耐。我係不滿官商勾結，政府再發學院牌，令駕駛學院恃住師傅驚被炒、又無得走，剝削員工，無OT補水，以前同日返早晚更會補水百三蚊，而家無埋，一切剝削都係因為呢個不公義制度而出現！今次自殺不遂都有得着，之前駕駛學院炒咗兩個一齊搞工會的同事，其他同事再想爭取，但為咗飯碗，都疏遠我。今次之後，佢哋覺得對我唔住，而家夠膽同我講嘢，我已好感動。自殺後兩日去立法會發言，一激動就暈低，抗爭以來，係第三次。檢查後發現我的迷走神經有問題，唔激得。而家俾老婆話我「揦屎上身」，呢幾日「識