星期六上午 左丁山

幾個星期前，中貿林與佢位多年好友村長L組織一個旅行團到沙頭角吉澳一日遊，有專人代辦禁區紙，中貿林曾對左丁山講：「嗱，難得機會呀，你一個人去唔到㗎！」係嘅，但一睇行程表，要在星期六早上九時到達上水火車站與眾人集合出發，晚上日落後才回程，行程緊密之至，左丁山好難捱啫，於是放棄之。
不少人以為左丁山一星期工作五日，到咗星期六，可以有空參加本地一日旅行團或各種不同討論會、演講會等等。殊不知，左丁山自從有第一份工作之後，就從未試過朝九晚五咁準時返工放工，常常係朝八晚七之類，近年成為個體戶，更係任何一個小時都是工作時間，在外吃午飯晚飯也是工作，於是到了星期六，早上非到九時後不會起床，嘗試吓放慢節奏，飲壺伯爵茶，嘆十份報紙（七中三英），開住收音機聽香港電台第四台嘅Synthia Ko（古典音樂直至中午十二時，呢個節目叫做Play by Ear，好值得推薦），呢段時間係全星期最輕鬆寧靜時段，好唔想俾其他「節目」（例如九點去到上水或討論會、研討會）打斷，你話係唔係好中產嘅生活呢？唔飲咖啡，唔睇法國電影，都可以做中產嘅啫。
星期六嘅「金融時報」有一份地產介紹專輯（類似廣告），內裏嘅待售物業，百分之一百係非中產價格，城中最著名中產要人曾俊華相信亦無能力買入，不過我地睇吓睇吓當係腦海幻想，假設自己買入意大利Tuscany酒莊，法國南部渡假屋，當係心靈雞湯飲吓，都幾舒服。有時FT附送豪裝消費雜誌How To Spend It，十分好睇，不過有一位豪門大少爺曾經同左丁山講過：「How To Spend It介紹啲時裝與用品，我不時都有買，但老實啲講，九成幾嘅FT讀者係買唔起，只係恨吓嘅啫！」佢並非沙塵，只係講真話嘅啫。一位月入37萬元嘅「中產」若照足呢本消費雜誌嘅推介去入貨，保證佢連供樓都有困難，富豪與中產嘅財富鴻溝，實在難以跨越，人比人，比死人㗎！
星期一午飯，中貿林話佢地嘅沙頭角吉澳旅行團非常成功，有50幾個老友參加，沙頭角中英街令佢地開眼界，吉澳山明水秀，令人流連忘返，只不過因為節目太豐富，中貿林行路趕路，返到屋企，疲不能興，幾乎病咗！