「大踏步神情確威武，小子大名露寶，人人皆知道。」八十後卡通片回憶，除了叮噹，還有常拿着吸塵機及掃把在學校做家務清潔的小露寶。三十一歲的葉劍池（Angus），十八歲開始就在「麥記」做收銀，十多年來一步步攀升至副經理，人工仍然得萬三。他見餐廳外判的清潔公司接幾單job，人工已比自己高，於是前年創辦「小露寶清潔公司」，自己接job。但當初他就如小露寶一樣，有勇無謀，半年累蝕三十萬，剛巧兒子出世，無錢交租，Angus形容當時差點要「上吊」。後來，他參加創業課程班，認識餐廳老闆及食品供應商，建立人脈網絡；而且聘用後生仔做清潔，比大公司快手，終於穩定客源，扣除自己及職員薪金，每月盈利有三萬元。Angus再無後悔創業的決定，「神情威武」地說：「我終於可以報答老婆。」
夜十二點，Angus帶記者走進旺角朗豪坊一間餐廳廚房，撲面迎來一陣酸臭及清潔劑混雜的氣味，雖然未至於頂唔順，但令人難以專心工作，Angus笑指：「呢間西餐廳算乾淨啦，如果係日式餐廳會仲污糟，因為炸天婦羅啲油勁臭。」以這個四百呎的細廚房為例，徹底清潔收費一晚約二千多元，定價根據污漬程度而定，「廚房佬唔會清潔，爐頭嘅油漬可以好黑好污糟。如果抽氣系統積得多塵，要清風口同水煙罩，要另外加收三千至五千。如果要爬高爬低，長期姿勢唔好，又要再收多啲錢。有時某啲餐廳太污糟，單都唔接啦，唔想做死班伙記。」Angus推着價值千八元的吸水機吸走爐底下的污水，又用鐵鏟用力剷走煮食爐的油漬，鏗鏗聲不絕，「不銹鋼啲漬一定要用手剷，鋼太薄用機整唔走，你睇剷完由黑色變做銀色先叫合格。」當晚清潔至凌晨四點才完成，日做十多小時的Angus仍堅持做司機車員工回家。
貪後生仔夠搏
記者見清潔時，主要由四名八、九十後的後生仔負責，Angus指他的公司不會請洗碗阿婆來清潔廚房，「後生仔其實做嘢好快手，而且清潔廚房要等餐廳關門先做到，捱夜都係後生仔好啲。」他指出曾請四十歲大叔，但工作態度「勁hea」，於是找來麥當勞的舊伙記來幫手，「同佢哋做朋友，要識得安撫佢哋情緒，其實後生仔做嘢都可以有交帶！」Angus指出，清潔本來很難界定誰比較優勝，但卻可從管理細節中贏取客人口碑。例如本地的大型清潔公司，一般都聘請上年紀的員工，而且採用時薪制，但小露寶卻用日薪制，「時薪制做嘢一定拖長嚟做，我每晚清潔一間餐廳，會出固定薪金，咁班員工肯定會以最快速度完成工作。叻仔嘅洗三個鐘完成就收到四百元！」另外，公司制度是由組長負責把關，檢查清潔完成後的所有細節，務求令客人收貨，「如果第二朝開門個客人唔收貨，組長要特登返去開工，但冇OT錢，責任自負下，組長一定盡力把關。」他又指公司制度較大公司優勝，因此經常搶到大公司的單來清潔，「啲新客人向我反映，大公司啲員工成日hea做，清潔唔夠乾淨，又冇人孭鑊去搞番掂，所以我哋先搶到客人。」
鎖定觀塘區
清潔公司利潤其實不少，但主要是難招聘具責任心的員工，現時部分員工是兼職，「日頭做一份，夜晚嚟清潔，時薪有一百元，另外都有人想同公司搏殺，將來做大咗，可以升職做管理，唔使再落手做。其實洗一個招牌可以收千幾，因為要爬梯，但難請人做，我試過一個人用升降台升上四層樓高嘅商場洗外牆，咁就收五千元。」但為了公司能長遠發展，及減少自己落場負責清潔的工作時間，用來專注宣傳及管理，Angus想出了一個方法。首先他決定公司不再跨區接單，除了可靈活分配人手，更避免和大公司競爭，「例如港島商業區，都俾莊臣同碧瑤壟斷晒，唯有避開唔做中環金鐘呢啲地方，咁而家主力做旺角之外，仲會鎖定觀塘區。」他指出觀塘除了很多甲級寫字樓，亦有不少商場及餐廳，未來亦會重建，更重要是該區目前沒有大公司去包辦廚房清潔，正是小露寶擴張勢力的最佳時機。目前除了部分麥當勞是公司客人外，亦可以接多些連鎖餐廳的訂單。
改錯名難搵客
Angus不怕辛苦，因為再辛苦他都經歷過。臨離職前，他已位至分店副經理，一腳踢包辦銷售、煮食及清潔工作，人工卻極奀。晚晚工作至深宵的Angus，與晚上來清潔的外判公司負責人傾談，發現他們清潔一、兩次的收費，已好比他份糧。他憶述：「閒談間，我問分店經理，如果我開一間清潔公司，洗得乾淨過而家嘅外判公司，可唔可以俾機會我試吓，佢話可以。」於是Angus把心一橫辭職。不過，開業半年，扣除人工，勁蝕三十萬。他當初把公司名改為「宏信」，這成了「見血」的致命傷，他說：「個名太普通，無人記得我間公司做乜，派一百張卡片，先得四張單。」積蓄幾乎花光，要靠老婆出外打工擔起頭家，「嗰時差啲要上吊，冇錢交租，個仔啱啱出世，好彩有老婆支持，佢仲叫我撐落去。」Angus決定堅持，並嘗試找方法解決。首先他去參加坊間創業課程，「老師叫我要改名，諗一個客人一聽就知你間公司做咩業務嘅公司名，借力打力。」他才把公司名改為「小露寶」，「餐廳老闆有番咁上下年紀嘅人，佢哋嘅年齡層多數識小露寶，知道小露寶最叻就係清潔。」坊間大部分創業課程，都被人笑稱為「洗腦課程」，但Angus認為上堂對他幫助很大，「雖然係洗腦，但亦擴闊咗我嘅人際網絡，亦令我更加主動去識人，識啲食品供應商，再叫佢哋介紹啲餐廳客俾我識。」另一方面，他再向銀行借十六萬元，讓公司有資金繼續營運。
免費檢查提高收入
解決問題後，公司由每月最多接到七單外判工作，到現時一個月有二十四日有工開。不過公司成績好轉，他又因一次決定錯誤而蝕錢，「半年前麥當勞有另一個區都想搵我去清潔，有成十幾間分店，我就投資咗十八萬去買車，仲開第三條team去負責，點知我計錯數，原來新嗰批麥當勞分店關門時間太夜，加上該區域與其他客人相距甚遠，車程長，七除八扣下根本冇錢賺。」捱一個月後Angus決定忍痛裁掉成team人，並蝕讓新車，埋單蝕了四萬元，「所以鎖定區域真係好重要，而且教訓我擴張唔好太心急。例如我唔應該買車住，開新team時租車先，咁成本唔會太貴，而且接單時一定要分配好一晚走到兩場，咁先有多啲錢賺。」為了提高生意額，Angus也會主動向客人推介清潔套餐，如免費幫客人檢查冷氣通風口、外牆及抽油煙設備等，如衞生出現問題，便可向客人推銷額外服務，提高收入。Angus為養家，十分積極，除了晚上清潔餐廳，早上接單清潔辦公室。不過「做爆廠」的他，每天只睡三小時，「值得嘅，公司開始賺錢，老婆唔使再出去做嘢，專心照顧小朋友，總算可以報答佢。」
開業資料（3/12）
公司清潔車：HK$180,000清潔劑及器材：HK$40,000保險：HK$20,000宣傳及雜費：HK$18,000總投資：HK$258,000
營業資料（12/14）
營業額：HK$180,000清潔劑：HK$3,000人工：*HK$130,000雜費：HK$20,000盈利：HK$27,000*5名長工9名兼職，包括老闆人工