上星期《壹》仔講到，亞視股東蔡衍明怒插另一股東查懋聲，仲話佢係「亞視幾十年來唯一賺錢嘅老闆」。咦，唔通佢忘記咗亞視陳年股東邱德根？邱德根傳聞都係絕無僅有喺亞視搵到錢嘅老闆，佢入主嘅82至89年間，以「孤寒」聞名。最經典嘅，要數員工不論「大小」，廁紙只能用四格，兼且不可帶回家。小宗聽另一亞視老員工講，當年公司派月餅券，不是每人派一張，而是每一組派一張，更絕的是，月餅卡指明只能到離島換取，搏員工嫌麻煩唔換，將餅卡歸還公司。但員工你精我都唔笨，叫阿姐收集晒每組餅卡，一次過到離島換取，以領受老闆嘅「恩情」。老員工更憶述，有次收工老闆見到公司高層，熱情招呼員工上車，員工受寵若驚之際，駛到去海底隧道，老闆竟叫員工代付過海隧道費。絕！
有指邱德根1989年出售亞視後，全數股權淨賺$6億，比查懋聲更多。睇番歷史，由遠東銀行、荔園到亞視，都見邱德根做生意何其精明，亞視想賺到錢，呢招而家仲work唔work？
踢竇試食皇家飯
上星期，有朋友失驚無神同小宗講：「去食『皇家飯』囉！」當堂嚇一跳，然後得啖笑。原來，朋友講緊嘅係位於荔枝角收押所側邊嘅員工餐廳「名門」。話說，當日郭氏二太子炳江入住收押所時，都可以叫外賣食，未知佢有無叫過名門外賣試試佢呢又？雖然名門位於懲教署職員宿舍的club house內，但亦都對公眾開放。網上流傳訂位時，要講暗號：「約咗懲教署署長食飯！」呢個當然純粹整蠱。餐廳內籠係普通酒樓格局，小宗一行人去到，位都唔使等，直接入座。唔好以為佢無生意，全場有八成滿，除咗有唔少著住制服嘅阿蛇幫襯，亦有好多附近返工嘅OL捧場。食客唔怕大吉利是行入收押所搵食，皆因價錢大眾化，客飯三十蚊個，小菜五十蚊都有交易。一坐低，問阿姐有咩撚手小菜，阿姐就豪氣咁答：「豉油雞、醬爆骨。」於是小宗就聽阿姐話落單，另加個籠仔斑粒飯，埋單剛好二百蚊。老實講，味道不太突出，不過勝在價錢大眾化，阿姐做嘢夠爽手，加上免茶介加一，夫復何求。
德勤清盤王靠「破產」上位
講起亞視，焦點人物除了幾位股東乜乜乜外，不得不提幫亞視睇檔嘅「清盤王」、德勤中國華南區主管合夥人黎嘉恩。佢過往幫多間上市公司如福記（1175）、金至尊（870）清盤，又做過龔如心、梅艷芳遺產臨時管理人，及協助數碼電台DBC重組。總之公司有問題都識搵佢！省靚咗塊金漆招牌。原來黎嘉恩中學時就讀九龍華仁，於樹仁學院會計系畢業，佢一位舊同學同小宗講，黎嘉恩屋企環境唔錯，仲有位馬姐服侍，不過讀書成績就唔多好，加入德勤後入唔到最吃香嘅審計（audit），轉咗嗰陣無人吼嘅破產（insolvency），啲同學仔都估唔到佢而家咁成功，所以話讀書成績唔代表一切，見盡公司起落嘅黎嘉恩，自有一番體會噃！
本週ICON
望住對腳，瘦瘦長長，好靚噃！望埋上身加髮型，仲唔係葉劉？行埋前面望，噢，原來係大新銀行主席王守業位夫人嚴君琴。出嚟行最緊要icon，佢髮型多年如一，無論波場同商場都吸引到記者眼球，唔好意思，忍唔住偷拍你。
金牙大狀講嘢校長哀榮前無古人
校長李福兆出殯，扶靈嘅有姪兒、前行政會議成員李國寶，亦有入過赤柱之金勞詹。政界中人到來致祭者，由689、鬍鬚曾打落，冇乜邊個冇現身。自開埠以來，入過冊而有校長之哀榮者，未之有也。校長一生功過，到咗呢一日，睇怕亦無須多講矣。校長人生轉捩點係八七股災，港股停市三日。冇呢個決定，肯肯定佢不致有牢獄之災。停市三日雖則淪為天下笑柄，話佢錯晒咩，電光石火之間做決定，除咗共產黨，試問邊個夠膽講自己永遠正確？至於有人話停市之舉係出於私利，以便出貨。咁點解冇人質疑，九八年千億入市打所謂大鱷，有冇人藉機上下其手？大家當又知道，剛啱有個打鱷英雄因受賄入咗赤柱噃。世間事物，牌面睇到嘅又點完全當得真呢？校長，RIP！