有人辭官歸故里，有人漏夜趕科場，有人辭完官又再想趕科場。這些年高官劏房囤地不用避嫌，特首秘收五千萬報酬不用申報，民意跌至新低，今年7.1五十萬人上街、過萬人佔中超過一個月……無人問責，賴死不走，完美示範「人無恥便無敵」的精神。這時候，有人開始懷念舊人。○三年因偷步買車而下台的前財政司長梁錦松，最近忽然成為下一屆特首的大熱人選。去年底幾場政界飯局，加上好友馬時亨積極「馬拉松」，阿松參選的傳聞甚囂塵上。上月中，前特首董建華組成民間智庫，找來梁錦松做顧問，被解讀是為對方造勢，立時成為特首黑馬。本刊記者與梁錦松進行專訪，今年六十有二的他，形象是個好爸爸、好丈夫；棱角磨掉，囂張性格亦變得圓滑。對於參選，他從不閂閘，把波交給上帝，「上帝有最好安排，佢俾我機會，我只能接受。」講到佔中，他說：「係大轉機……唔好讓一個咁好嘅事，浪費咗佢。」留後路、講民意，係比現任特首梁振英高一皮。
「松哥！松哥！握吓手！沾番啲財氣先！」上週日，國際扶貧組織小母牛在大埔大尾督舉行慈善競步賽，由巴士站行入船灣淡水湖的一段五分鐘路程，猶如落區的阿松多次停下，迎面而來的市民熱情非常，又要握手又要影相。「松哥我哋支持你，企出嚟帶領香港！」梁錦松淡淡然，繼續笑笑口：「香港人其實好可愛，好理性，好和平。」十年前的「杜松」變成今日的「松哥」，香港人其實也很善忘。
論佔中「係大轉機」
○三年阿松因偷步買車下台，當時區區十九萬元，今日看來「罪行甚輕」，最重要是，當時他順了民意落了台。到今日，香港人以佔領表達民意，佔中發展了一個月仍未完結；梁錦松對佔中的睇法，意外地並不「官腔」。他向記者說：「我諗（學生）要多啲思考呢件事，你的目的，你想達到的後果，應採取咩手法，所謂有理有利有節。我嗰日先同朋友講，唔好讓一個咁好的事件，浪費咗佢，我希望事件能夠盡快解決。之後各方面要思考問題出喺邊度，點避免事情發生，在處理上雙方的策略啱唔啱，係好多嘢學。」作為一女兩子的父親，他說小朋友年紀尚小，未明白佔中，「有時都問點解會阻住佢返學，我都話凡事睇兩面，要理解人哋角度，唔能夠淨係諗自己嗰邊。」他認為現在社會活動，將香港嚴重撕裂，「但從另一角度睇，又可能係好事喎。好多人好心痛，可能係大轉機前的好狀態。因為當社會差唔多每一個人，甚至北京都有人覺得，以往咁嘅做法可能不能繼續落去，要諗吓點變，可能準備到以後有大轉變，而社會亦會接受大轉變，從呢個角度係好事。」
論參選「等神感召」
梁錦松出任國際小母牛香港分會主席十年，不時和家人身體力行，到山區體驗農民生活，最引以自豪的，是成功將善款暴增二十多倍，至今日的四千萬元。不過荏苒十年，他似有所暗示，「我以前成日都講，一個人响一個位做得太長，到咁上下江郎才盡，有冇考慮做其他嘢呢？」去年底，一向低調的梁錦松，被揭出席政界飯局，又開始接受不同傳媒訪問，被指為參選下屆特首選舉鋪路，上月加入全國政協副主席兼前特首董建華的「團結香港基金會」，成為智庫顧問，參選一事甚囂塵上。阿松最初以「傳媒太好想像力同創意」否認，後來說「無計劃」參選，今次訪問再「行前一步」，擺上帝上枱，「上帝有最好的安排，佢俾我的機會，我只能接受，所以真心盼望有好多嘢做……但呢件事的可能性係……因為上帝你唔能夠話佢無（可能），但極低啦。我六十二年人生裡面，好多轉變你諗都諗唔到，就發生咗。」與十年前相比，離開政府又信主的阿松，變得謹慎而圓滑，不似心高氣傲的葉劉淑儀把參選說到口邊。「上帝論」進可攻退可守，給自己留一個下台階，亦不完全閂閘，有空間繼續讓傳聞發酵，訪問中他繼續笑說：「天大地大幾大空間呀，你話上帝創造成個宇宙，你話大唔大空間？」梁錦松自言是個停不下的人，○三年下台，到○五年當上小母牛主席，做到今日，「我已同朋友講咗、同太太講咗，我唔打算退休，因為我退過休，好悶。」因為怕悶，之後再做工商銀行（1398）獨立董事和美國私募基金黑石的大中華區主席，現職南豐集團行政總裁，「做番嘢好開心，香港係好多機會的地方，從來無諗過無嘢做。」
論政界「老董係我老領導」
梁錦松處處露口風，再加上他與政商界的關係，「特首黑馬」自然被睇高一線。去年他與曾鈺成最少三次出席政界人士的飯局，傳聞政協常委戴德豐、政協委員紀文鳳、前政務司司長唐英年、前律政司司長梁愛詩、前金管局總裁任志剛、行政會議成員羅范椒芬等人，都有出席。梁錦松承認設過飯局，「有飯局，十幾個人，係傾普選o架嘛。呢班人間中都聚吓，為咗香港可以往前走，我哋真心覺得應該。」一二年曾獲梁錦松站台的唐英年，飯局後亦「禮尚往來」，開腔大讚梁能幹及有心服務社會，鼓勵對方參選。同為「特首黑馬」的曾鈺成，則形容梁是「叻人」、「有心人」，若出來選都是好事。對於曾鈺成，梁錦松直言很敬佩他，「佢係我師兄，佢讀書叻我好多好多，佢係好有立場，非常之友善，佢係好聰明，同佢傾偈好多得着。」但要數梁錦松最大後盾，不得不提董建華。眾所周知，梁與董淵源甚深，七一年，梁被選中參加董建華父親董浩雲創辦的海上學府，整個學期乘坐海上學府郵輪遨遊四海。○一年，梁在董建華提攜下，出任財政司司長，他形容董建華是真心為香港，「佢無私心的，佢淨係諗點可以幫到國家，幫到香港發展。我對佢極之敬佩，同埋佢係好支持啲下屬嘅。唯一係佢勤力過我，佢有時忍到好緊要，諗我差唔多起身先打俾我傾公事。」即使是離開政府之後，二人不時聯絡商討香港發展。上月董建華成立民間智庫，邀請梁做顧問，梁直言「無得say no」。那如果董生叫你做特首呢？「呢啲假設性問題，我覺得唔需要答，我諗亦都唔會發生，哈哈哈，你問阿董生啦。」
論家庭「最大顧慮」
梁錦松的諸多顧忌，其實不難理解。這幾年「黑材料」經常從天而降，江湖傳聞曾鈺成、金管局總裁陳德霖，亦被威脅要揭黑材料，嚇得不敢參選。梁錦松承認這也是他所憂，「我好擔心會有人喺度，可能種種原因，唔知做啲乜嘢啦，所以千祈唔好炒作……（擔唔擔心自己？）我實會……就算而家我話無計劃（參選），我諗都有好多人做緊古仔o架啦！（點應對？）我唔選咪無事囉，係嘛？哈哈！」梁錦松的最大顧慮，是家人。訪問中被打斷三數次，有時是大仔皓嘉不耐煩要回家，有時是細仔家瑋叫肚餓，老來得子的梁錦松不忍發脾氣，看見他們就忍不住笑，「大仔個樣最似阿媽，身材似足我成條藤。」自與跳水皇后伏明霞結婚、誕下三個仔女後，曾經緋聞多多的梁錦松，成功打造一個好丈夫、好爸爸的形象。對於參選，他直言伏明霞不肯放人，「佢話為咗屋企，你最好唔好去啦。」他解釋，從政最大的代價，不是男人付，而是家人付，「無晒自由，細蚊仔出入都有安全問題，太太唔可以出去同女朋友飲茶食飯。每日見到自己男人喺出面被攻擊，造謠、抹黑，屋企人咩都做唔到，只能默默承受。」他又聽過前政府同事的仔女被取笑，「响學校聽到同學仔嗌佢哋花名，話佢哋爸爸係乜乜，即係好多花名，好難受。」所以他說很同情梁振英，「我好同情o架，我覺得佢好努力。佢屋企我覺得傳媒唔應該去做咩新聞，因為屋企有屋企的事，希望傳媒朋友能夠體諒吓佢。」說到家庭，梁錦松會較「放」，尤其說到和太太伏明霞的相處和矛盾：「你話兩公婆完全無矛盾就假嘅，佢成日話我：『你唔話俾我聽呢樣，又唔話我聽嗰樣。』好多嘢我last minute先話要同邊個食飯，有啲嘢我做咗，又無話佢聽。咁我話：『我忙吖嘛』，佢會話忙係藉口咩？你要話俾我聽吖嘛。佢好處係隔一陣就唔嬲，我諗佢性格好直，我哋有共同信仰（同為基督徒）係好好。」
評價自己「唔夠圓滑有做錯」
下台十年，回望過去，梁錦松承認，沒有申報買車是錯，但下台是恩[!8FF5]，「有啲人用英文講嗰件事係『blessing in disguise』，即係隱晦的好事，我話係『blessing, full stop』，淨係恩賜。」○二、○三年，政府財赤六百多億元，梁錦松在財政預算案中手起刀落，要十八萬公務員減薪、減綜援，又加稅。最難聽的是，他形容香港人「有咁耐風流，有咁耐折墮」，結果得罪全港市民，被罵要「杜松」，「因為以前信心滿滿，以為為香港做到好事就得，有時唔係好理人哋感受。」換了今天，他說可以做得圓滑一些，「多啲時間傾，效果可能會好啲。當時要減公務員人工、減人手呀，其實經濟上嚟講完全啱o架，但就得罪好多人，咁係咪要做得咁急呢？件事可以做得圓滑啲。」加入政府前，梁錦松在商界打滾四十年，在投行摩根大通位至亞洲區主席，落台後繼續投身商界。商界中人形容，梁最叻炒匯，但不是管理高手。○七年梁加入黑石，代表作是拉攏中國投資公司，以二百多億入股黑石不多於一成股權。但黑石上市後，遇上金融海嘯，股價由三十美元一直插水至最低四美元，中投一度損手過億港元，被內地投資者大罵他倒錢落海，但他不以為然，「市場永遠都係預測唔到o架啦，如果每日都預測到，呢個世界無窮人。」今年黑石股價才重返家鄉，加上派息，中投不至蝕錢，「當年中投同黑石簽咗戰略備忘錄，黑石為中投提供技術協助和培訓，所以中投都講過，投資黑石係好好的投資。」展望未來，梁錦松除了想做更多的工作，還要兼顧好家庭。他強調沒有外國護照，亦不會移民，暫時亦不會送子女出國讀書。起跌十年，他說有所感悟：「千祈唔好諗人哋點睇你，尤其是所謂歷史點睇你，因為歷史唔會記得你。」
松鋪特首路
曾幾何時，梁錦松被視為董建華的特首接班人，惟○三年「偷步買車」一役引發民憤被踢走。蟄伏十年，阿松蠢蠢欲動回歸政壇，試金石是去年兩大動作：一是透過「老死」兼屬李嘉誠陣營的馬時亨試水溫；二是他與立法會主席曾鈺成私下多次飯局，更得到一眾政壇老手撐場。梁錦松本是「唐營」一員，曾撐唐英年選特首並與傳統商界友好，他另一個身份，是李嘉誠打高球的波友。去年突然傳出梁錦松選特首，政界耳語是由李嘉誠陣營人士，透過同屬「長江X號」的阿松港大同學馬時亨放風。眾所周知李嘉誠和689之間貌合神離，689上台後一直未能深得以李嘉誠為首的「唐營」舉腳支持。阿松要做特首，北京開出的考牌條件就是要真真正正統戰一個建制「香港營」。有知情者透露：「阿松係李嘉誠為首嘅傳統商界接受嘅人選，如果佢修補番破裂嘅關係，阿爺會准佢入閘。」
李嘉誠陣營撐
梁錦松與李嘉誠的關係，亦可憑一些蛛絲馬跡看到端倪。○二年梁錦松前妻譚淑芬，將中漢投資公司的股份轉讓給梁錦松，中漢另一名股東余立發，是李嘉誠頭馬霍建寧的同學，亦曾幫李嘉誠打理加怡融資。此外，說自己甘願「馬」拉「松」的馬時亨加入政府前，曾任電訊盈科（8）執董及財務總監，與李嘉誠、李澤楷關係密切，他亦承認與新鴻基地產（16）的郭家，及信和（83）的黃家都是好朋友。梁錦松的人脈，正是其政治籌碼。阿松近日備受注目的同時，拉「松」的「馬」又頻頻亮相。對於梁錦松上週說無計劃參選特首，馬時亨回應本刊時大唱反調，重申有關解釋不會有任何作用。「最近我見過佢，佢話無計劃參選，但我話你咁講根本無用，最近董生同你咁多動作，大家都覺得你為競選鋪路，揣測會繼續出現。」與阿松同是基督徒的肥馬，暗示阿松或會改變主意：「佢係一個有心有力嘅人，我唔係佢肚內條蟲，佢一直話唔選，但係我記得佢公開講過，好多嘢係神嘅旨意，呢方面我就唔知佢想演繹啲咩，你要問佢先知。」如果阿松真的選特首，肥馬坦言全力支持，卻意有所指屆時老友的班底非常雄厚，未必需要自己出手：「到時可能佢都唔使我幫，大把人會出嚟，你知呢個世界喇，佢一旦出選，實會有好多人幫手，有啲仲叻過我，同埋有助選經驗。」與當日他說會捱義氣做其競選辦主任的說法有異。
與曾鈺成飯局
雖然梁錦松口口聲聲話無意重返政壇，但原來過去一年，他與一眾政界元老不時打交道。政界盛傳，曾鈺成是其中一位撐阿松去馬的左派中堅。曾鈺成一度被視為下屆特首黑馬，早在去年十一月，他和另外兩名左派核心兼梁錦松由細玩到大的好兄弟，定期有飯局聚會，兩人是全國政協戴希立、香港政策研究所行政總裁馮可強。梁、戴、馮三人都是六、七十年代學運的國粹派，相識於微時。飯局之初梁錦松未有加入，只有戴、馮和曾鈺成，後來才演變成十二人，曾鈺成曾向友好傳媒透露，十二人食過三次飯，討論政改，此時梁錦松有加入，其餘人士包括「689梁粉」羅范椒芬、張志剛、紀文鳳；以及程介南、梁愛詩、馬逢國、張家敏等。曾鈺成說過，戴希立找來梁錦松等人，他只找了程介南一個。而飯局的共識，是希望向北京表達二○一七年無普選，香港會出現很大的管治問題。
搵詹培忠傾偈
馬時亨放風加曾鈺成飯局，梁錦松去年一度被估計會搶先出閘，更有傳在添馬艦的689也要忌他三分。但踏入今年初卻突然轉趨沉寂，肥馬更改口話被阿松責怪，不少人覺得「馬」拉「松」玩完。政界流傳一種說法，指梁錦松對外宣稱無意參選，只是韜光養晦策略，事緣去年底689赴北京述職後受壓，梁營打擊異己部署行動升級，被梁營列為主要追擊目標的梁錦松，隨即刻意淡化角逐消息。但相隔數月，梁錦松再次靜極思動，加上佔領運動全城高呼689下台，阿松的跑馬仔指數隨即急升。來自北京中間人指，當老董接獲北京聖旨，開始廣邀各界加入智庫時，阿松亦於七、八月四出拜訪及約見一些具分量的建制派中人。見微知著的政界人士，近日看到楊柳隨風擺向另一邊，就回想起去年底的曾鈺成飯局，估計與會的曾班底，或能順水推舟變成松班底。有人回想「曾飯局」當中兩名中堅分子都是梁錦松由細玩到大的砂煲兄弟，就「叮」一聲想到飯局的本意，難道是由他們幫好兄弟擺英雄宴。此外，近日政界熱傳外號金牌庄家、前立法會議員詹培忠，曾幫阿松搞過一些政治飯局。記者致電「金勞詹」查問，他先說：「傾偈啫，咁嘅做法，如果董生係叻嘅，就唔使腳痛啦，講得出呢句說話，我自己係唔係有意（幫手）一諗就知啦。」他又透露，和阿松見面是幾個月前的事：「佢自己都成日唔認（有意參選特首）o架啦。」但自稱不會再表態撐任何人做特首。
擺公僕和頭酒
董建華正籌組的智庫，被視為挺松機器。知情者透露，北京指示董智庫其中一項任務，是要重新凝聚及整合建制派及傳統商界力量，透過智庫建立香港營。梁錦松則是老董挑選的香港營共主，未來兩年要「考牌」。有參加兩次會議的基金會成員透露，阿松會前及會後均表現輕鬆，但與會大部分時間，不發一言，專心聆聽別人意見，完全投入一個領袖的角色。自「馬拉松」撲出後，梁錦松亦開始接受訪問漏口風，說反思昔日為官最大失誤，是滅赤過分進取而得罪不少人。阿松覺今是而昨非，明顯想化解當年公務員隊伍對他的不滿，這也是他在政壇復活前，必須拆解的一個結。多名和梁錦松有交情的政界人士均指，○一年五月梁錦松加入董建華政府做財政司司長時，意圖一展抱負，但致命傷是減公務員人工。一位政界元老近日私下形容：「阿松係叻仔，不過佢忘記咗入政府之後，唔再係美資銀行嘅大班，唔再係老闆，得罪班公務員，最怕佢之後江山易改本性難移。」這位元老又透露，當年「偷步買車」是某位極高級公務員整蠱阿松，如今他希望東山再起，最重要是修補和公務員的關係。本刊得悉，過去兩三個月阿松曾多次和公務員團體飯聚，席間表達當年提出減薪方案的歉意。政界都指阿松已整裝待發，只欠「北」風。
「馬」拉「松」三勁敵
馬時亨直言除梁錦松外，新民黨主席葉劉淑儀、政務司司長林鄭月娥及行政會議成員陳智思，均有力競逐2017年特首寶座，他更認為葉劉必定去馬：「實出嚟選，無論一人一票或千二人投票都會。」綜合政界分析，三人各有優劣：