學生走在最前線抗爭，一班商界大孖沙，未有表態，好似潛咗水一般。小宗就搵咗城中富豪、金融精英嘅一批童年照。唔理佢哋表面、內心撐唔撐學生，舊照所見都是一臉稚氣，機心計算一定比現在少。大家又認唔認得佢哋係邊個？答案在本欄找。
6. 任志剛5. 李澤鉅4. 李澤楷 3. 李家誠 2. 梁錦松 1. 王維基
中環寸嘴經紀特性累香港
呢幾日行大運呀，喺屋企落中環要兜個大運去西邊街；佔鐘運動，令到啲食肆出現「佔中價」。拎張HSBC信用咭夜晚去香格里拉酒店食飯——五折，不過家陣有錢又得閒都無心情去食啦。
我都有唔少紅酒腳喺CY搞起嘅香港專業聯盟入面，做特首前，梁振英提拔過幾條友去replace佢主席個位，班友話：「寧願返屋企陪老虎乸，都好過與狼共舞。」後來搵咗自己友劉炳章做主席。呢個專業聯盟原本講到好堂皇o架，係幫香港專業人士北上搵食。結果係點，大陸佬學咗你啲嘢，就走人，講會計界，大陸嘅公司會計都唔用國際標準，使鬼你香港啲會計師咩。講法律界，啲律師行除非同上面啲律師行結合咗，否則都唔可以北上做生意。
以前田北俊批評過CY，話佢只係高級地產sales：據我觀察，CY有「職業病」，就係做成單買賣，收咗個經紀佣，之後睬你都傻，最多都係搵啲「?仔」同你follow up；作為工廈小王子，都領教過唔少呢啲經紀嘅「特質」；除非佢嗅到你有第二單deal，咁都仲會湊住你。如果一個人做公職，搣唔甩嗰種職業病，個心只係想攞彩，香港仲有無將來？奉勸香港學生，以前書中自有黃金屋，家陣書中只有午餐肉咋。
工廈大王楊耀松大仔，家族的收租物業，遍布港九，屬正牌收租公。自認寸得起，唔怕得罪人，有嗰句講嗰句，平日喜歡流連富豪飯堂品嘗美食，仲喜歡到新開食肆「踢竇」試新菜。
強闖廣東道係郭國全親友？
上週佔領去到尖沙咀，一名男子揸住七人車硬闖廣東道「人肉路障」不果後，既報警又怒罵：「我要帶兒子去冒險樂園，這是正常香港人放假的活動，我有自己的人權！」駛走前他更想俾錢警員，幫忙買水解渴，引起嘩然！小宗check過，持有車牌嘅王寧寧，名係國語拼音，身份證係R字頭，住喺九龍城豪宅，係相當富貴嘅「香港人」。同佢一齊買樓嘅郭姓女子，早幾年報住寶馬山豪宅，該豪宅由前港府經濟顧問郭國全持有，hold到而家。郭國全曾經係渣打及滙豐嘅經濟師，而家係港大經濟金融學院名譽高級研究員，亦係提出政改方案嘅十三名學者之一。背後成串關係，有無咁啱呢呵？
本週圖片
早幾天，旺角有架N689巴士，目的地通往「地獄」。這幾天重陽節，新巴真係有架388（港交所編號）特別班次，開往「墳場」。Well，
有啲嘢，信不信由你！
喜記實力雄厚
來到銅鑼灣，佔中搞出咗單「非禮羅生門」。話說喺鵝頸橋底炒辣蟹而響晒朵嘅「喜記」，其創辦人廖喜兒子廖偉文，涉嫌非禮佔中女生，抱住女生隻腳，惹來軒然大波，有食客罷食，亦有人致電臭罵。喜記於本週一開記招，廖偉文澄清沒有非禮意圖，只是當日情況混亂，在人群中跌倒。「為了不被踐踏，本能抓着離自己最近的腳穩住身體。」佢當日仲講過：「我就來餓死！一家人幸福就無！」生意受影響，當然值得同情，不過小宗發現喜記廖氏，實力雄厚噃！佢哋持有銅鑼灣馬師道22號地鋪，08年恒基以十二億元收購馬師道一帶地段時，該地鋪亦被收購，廖氏唔知分得幾多呢？而喜記嘅謝斐道總店，鋪位亦由廖氏中人持有，相信市值已逾五千萬元；仲有仲有其他銅鑼灣區物業。原來廖氏理財能力咁強，咁當日係咪衝動咗啲呢又？
金牙大狀講嘢
香港唔係圍城鬍鬚曾喺網誌上話本來想打消去花旗開會之行，但覺得要向全世界解釋香港發生緊乜嘢事，故此毅然成行。佢又話呢個幾禮拜，香港翻天覆地，好彩多年來建立嘅「城牆」令「金融系統和市場運作大致暢順，沒有出現重大事故」。但道城牆頂得幾耐，冇人知；萬一頂唔順，必然帶來無法承受嘅創傷咁講。按鬍鬚曾呢個譬喻，香港咪豈非一座入邊嘅人想衝出去、外邊嘅人想衝入嚟嘅圍城？唔係吖嘛？家吓班後生向全世界宣示，佢哋喺風雨中緊抱自由為咗乜啫？係大家一條心衞我城喎！何曾有人話要衝出去啫？咪以詞害意至得o架。當然，咁唔等於話香港冇面對衝擊。班後生上街，正正係因為有人要喺香港實施「全面管治」，佢哋先至不得不起而抗命。同全世界解釋香港嘅局面，千祈、千祈唔好漏咗呢筆吖！否則就係嘥機票兼失職，OK？