2014-09-25 NM
爆哥相識滿天下，其中阿全職業係九巴司機，底薪雖然只有八千蚊左右，但加埋超時補水、良好服務獎、安全駕駛獎及年度表現獎，每月平均都有萬三蚊「頂薪」人工嘅，但佢同爆哥呻，話揸巴士好大壓力，最怕發生交通意外，因為萬一發生交通意外，分分鐘賠上半個月糧，搞到佢同同事日日都好大壓力。
原來每當巴士發生意外，九巴會立刻派出一名稽查到場擔當臨時判官，當覺得係自己同事唔啱，稽查會游說同事自掏腰包賠錢私了以免被警察扣分。但部分司機卻對此安排非常不滿，認為係公司想慳錢。阿全就話較早前跟一架私家車發生碰撞後，稽查到來指係阿全責任，更即場半挾半氹咁陪住阿全到提款機撳五千蚊俾對方司機，之後阿全肉痛到無心機返工。阿全所呻不無道理，因九巴自行承包保險責任，也公開承認無需向外購買保險，換言之司機唔賠即係要九巴賠，所以先盡量叫司機自己出錢了事。但當然個司機可以堅持唔賠，公司自然唔會出錢私了，咁就要鬧上法庭，成件事最後都搞到唔想賠錢嘅司機好煩，每日壓力大到爆錶，分分鐘影響乘客。