最近金魚缸最爆嘅醜聞，非諾奇（1353）主席兼大股東丁輝夾帶私逃莫屬。上市僅八個月，丁輝就將上市集資所得三億元嘅一半資金，轉到內地銀行做抵押，借走五億七千萬後，便人間蒸發，公司至今停牌超過一個月。
有心設局呃錢嘅丁輝固然罪無可恕，奇就奇在，諾奇嘅招股書上，寫明曾被中證監質疑其營運模式，兩度被拒喺內地A股上市。作為保薦人嘅建銀國際審查時不但沒有加倍小心，更「巧合地」喺諾奇停牌前，連續三日大手沽清手上逾兩成嘅股份，留下一個爛攤子俾欲哭無淚嘅小股東。所作所為，無不令金融界嘩然。睇番呢間建銀國際，牌頭唔小嘢，係四大國有銀行建設銀行（939）嘅全資附屬公司，○四年喺香港註冊，而家由全國政協謝渡揚揸旗，係近年中資投行中的「新星」。過去兩年，參與過數十隻新股上市，大小通吃，有國企如中國信達（1359）。而集資額數億元的民企，亦唔放過。心急上位，終於出事。 客仔當中，除咗諾奇，今年一月上市嘅米格國際（1247），股價至今亦暴跌四成三。再早啲，要數一一年上市嘅青蛙王子（1259，現稱中國兒童護理）「最杰」，建銀國際亦是其獨家保薦人，去年被指賬目造假，股價半日內暴瀉兩成半，最後要「改名」止瀉。客仔連環出事，建銀國際由「新星」變成「霉星」。正籌備來香港上市嘅投行中金，原委任建銀國際為三大保薦人之一，最終擔心被拖累而叮走「霉星」。正所謂，面係人哋俾，架係自己丟，怪得誰？
中環寸嘴點只魚蝦蟹咁簡單
上期《$300福臨門食龍蝦》出街後，老友來電寸我，使三嚿水喺福臨門扮魚蝦蟹。先此聲明，我工廈小王子非富豪，頂多只係Upper-Middle Class，透過飲食想教大家向高層次邁進。出嚟行，識食係一門藝術，唔少老闆請人時都會同見工者食餐飯，相吓有冇本事擸大生意。嗱，同客食飯，要諗吓有乜potential大刁落鑊，公司budget allowance有幾多。同老細食飯又係另一回事，中國人有句話：「食飯先嚟教仔。」所以老細請食飯喎，坐落嚟先知味道！曾幾何時，收咗條仔喺公司做暑期工，當徒弟咁湊，帶佢去唔同會所食飯見吓世面，死鬼老友羅兆輝話齋，「日頭就Hong Kong Club，夜晚就Club De Hong Kong——即富都夜總會」；後來條仔加拿大畢業返香港做嘢，都冧到幾多女，只不過佢想高攀一位有錢女，呢位富家女個老豆，就安排一次家庭旅行環遊世界一圈同佢「考牌」，去倫敦、紐約、溫哥華再返香港。去到英國，講英文無英國口音之餘，唔多識餐桌禮儀，幫人柯打菜式時唔識問吓有無對某食物敏感，或問吓餐廳有乜招牌菜、時令菜；去到紐約，出外用膳最少俾15至20%貼士，佢話俾唔慣喎。老豆俾個女睇吓男友如何出洋相，卒之，咪衰咗返來。所以話，點只魚蝦蟹咁簡單呀。之前去銅鑼灣懷舊西餐廳新寧餐廳食咗個Baked Alaska，配一杯黑牛（可樂溝雲呢拿雪糕），百零蚊，啲童年回憶返晒嚟，爽呀。醒你，Baked Alaska精髓係着火嗰幾滴酒靚唔靚。
楊國佳K.K. Yeung
工廈大王楊耀松大仔，家族的收租物業，遍布港九，屬正牌收租公。自認寸得起，謂「有我咁得閒，無我咁有錢；有我咁有錢，又無我咁得閒」，經常流連富豪飯堂品嘗美食，仲喜歡到新開食肆「踢竇」試新菜。
吳宗權「封盤」
會德豐（20）主席吳宗權，上週六下午，約埋一班香港沙灘水球隊隊員，去南區沙灘練波，兼接受Ice Bucket Challenge，淋冰水，做善事，大晒一身古銅色肌膚及四十吋胸肌。有錢有身材仲冇架子，可惜呢位超級筍盤，已「名草有主」 。早前本刊便拍到吳宗權收工後，帶同女友到文華東方酒店一樓的酒吧，會合朋友飲酒談心。據講吳宗權出名專一，中環嘅OL姊妹，睇來要另覓「新盤」了。
本週$最慳家
信置（83）主席黃志祥出名慳家，上週六下晝約兩點，小宗老友竟然喺港鐵車廂內見到黃主席，同普通打工仔一齊逼港鐵過海。好似搭慣搭熟咁嘅黃主席，喺尖沙咀上車後，就攝埋車門邊面壁。係人都知由尖沙咀到中環好塞車，而搭港鐵車程只係六分鐘，八達通價收費九蚊，又平又唔怕塞車，數口精嘅黃主席點會唔識計。
搞呢啲
精神科護士無陰陽之分，普通科護士卻有男女之別，男女一早平權啦，仲搞呢啲？平機會周一嶽唔好淨係識得