由麥肯錫出來嘅盧永仁，有「中環劏豬櫈」之稱，因為佢「去邊間（公司）、死邊間」。一一年佢入咗南華傳媒做副主席，當時佢話集團旗下有15本雜誌，希望可以幫公司發展內地市場，喺新數碼媒體落功夫，仲可能搵策略性股東，唔排除幫集團搞上市添！聽落勁多任務。不過咁，啲任務唔知做咗一半有無，佢已「唔撈」（唔知主動定被動囉）！
最近南華傳媒出咗內部通告，話盧博士已從副主席呢個位step down（退位也），今年八月就會離開，並專注個人發展及慈善工作。盧永仁自九○年由麥肯錫出身，廿年來做過約十間公司高層，次次都胸懷大計，但最後全部蝕入肉。 在互動多媒體服務公司，蝕數億；三千萬入股奇正科技（336）（現稱華寶國際），蝕四千萬；做海域非執董，公司爆煲；入I.T大幅擴展業務，盈利大跌七成要辭職走人。 戰績咁「彪炳」，但次次都有人請，咁仲唔係另一種「襟撈」絕技嗎？
職場秘笈水鬼陞城隍
港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。
發展商無論買一塊五千呎地又好，十萬呎地又好，需要用到嘅專業人士都一樣咁多。係咁意數一數，有認可人士、結構工程師、機械工程師、物料估價顧問、地質學專家、能源效益認可人、交通顧問、光學設計師……等等等等。由於，現時政府推地推得好快，市場完全唔夠人，所以搶貴曬啲人工。為了盡快展開工程，有時都要被迫請經驗及質素唔夠的人，所謂水鬼陞城隍，而呢班人做錯咗分分鐘都無人發現，到事後出現問題，就要浪費大量人力物力補鑊。望住新起嘅住宅，點解幢幢外貌都差不多？香港建築物條例，非常冗繁，加上近年不時有新條例出台，幾專業嘅建築師，為咗要符合啲條例，好多時要犧牲設計特色，無曬創意！尤其是大型項目，根本無時間及資源讓你入則去試新穎獨特的設計。好多行家，寧願Play Safe好過。只好慨嘆一句，香港現時地產的營商環境再容不下創意。
本週娛樂
做發展商嘅，最近想睇戲，梗係睇《竊聽風雲3》啦！嗱，本週日小宗就撞到世茂房地產（813）主席許榮茂，喺「平民區」太古城睇呢套戲。套戲講地產商、丁權、新界土豪、官商勾結等，要幾黑有幾黑，最終所有人仲一鑊熟添！ 睇完戲，許主席就一支箭標出戲院，搵司機接走。佢哋集團一向少留港發展，唔知許主席睇完戲，有無對「本土文化」加深瞭解？對結局更加有無嚇到標冷汗呢又？
小小超一啖砂糖一啖…
「小小超」李澤楷旗下香港電訊信託（6823）宣佈，供股抽水七十九億。向來冇益人的小小超，今次以兩成折讓供股，睇落幾筍，但供股比例為100股供18股，即係供完同時換來一堆碎股。搞到好多股民同財演，都質疑小小超嘅「誠意」。不過，有個跟咗電訊股多年嘅歐資行分析員，就話今次小小超焗小股東供碎股，係有後著：「電盈（8）用賣北京office啲錢嚟供股，條數剛好cover到，如果小股東唔供，就少咗幾十億，所以今次特登用平兩成嘅價嚟吸引大家供。至於多咗出嚟嘅碎股，有助於令流通量減低，穩定股價，方便下次再抽水。一六年前電盈仲有百五億債到期，有機會再集資。」咁小股東點睇？買咗八號仔超過十年嘅長情股東歐陽先生，話要考慮嚇，「當初佢實物分派香港電訊俾我，我拿來收息，所以佢舊年想以股代息，我都揀收現金。今次供股就算平兩成，但都貴過上市價，其實唔著數囉！」 小小超左手派息，右手抽水，羊毛出在羊身上。小股東一係供股就範，一係被人攤薄分派收入，笑得出的，睇來只有小小超囉。
立法會危矣哉
立法會俾班反東北發展分子衝擊，連門都拆爛埋，此又再一次證明，唔怕生壞命，至怕改壞名。喺立法會嚟講，就係至怕整壞咗個logo也。
各位看官，你睇嚇立法會個logo，不中不西，都唔知似乜。個「立」字固然唔健全完整——即係殘廢嘅啦！——個「L」字就鬼畫符咁；而至陰功嘅，仲係企唔穩；搖搖欲墜，咁有乜辦法唔危矣哉！
金牙大狀講嘢
「過度解讀」即係反中亂港大律師公會第一時間反擊白皮書所指，法官乃「治港者」之說。 果如此，無論政府告邊個，佢都好學得長毛咁飛髮兼洗定個pat pat等坐矣。知道香港人未養得熟，依家就將大陸嗰一套強加諸香港人身上，會引發反彈，港澳辦副主任徐澤連忙補鑊，但就誣捏大狀公會，話佢哋過度解讀。此又不禁令人要問：若然班大狀真係過度解讀，咁做法仲算唔算愛國呢，又？須知，客氣嘅，就話過度解讀啫；唔客氣嘅，就係危言聳聽，甚至造謠生事製造恐慌、打擊社會安寧、危害國家安全矣。唔少大狀都飲過鹹水，即使冇飲過，亦戴假髮扮老番，咁仲唔係勾結外國勢力？對付呢班反中亂港嘅麻煩製造者，係咪要二十三條侍候先？