備受爭議的本地手機遊戲《神魔之塔》，月初獲內地手機遊戲公司以5.46億港元入股，寫app仔一夜暴富，搞到人人心癢癢想靠寫app發達。
現實歸現實，並非每間公司都可以寫到WhatsApp、Flappy Bird出來，吸引到facebook過千億收購或狂賺廣告費。
訪問本地app公司，先知原來單單要生存，已經要扭盡六壬，箇中難度，就如玩緊過山車，七上八落先搵到出路。求生過來人Profile
李勁華（Keith） 40歲
手機電子書程式Innopage創辦人，03年創業寫app，至今已寫近三百個。
上年開發的Worthy交友app，獲Apple美國總部睇好，並於全球
37個地區的App Store主頁推介。
張民德（Dixon） 36歲本地手機遊戲公司Fingerprint主席，上年靠本地集資網站FringeBacker集資$38,187，成為首個靠本地集資網站成功集資的手機遊戲。
張明輝（Knuckles） 29歲、江振輝（Evan） 36歲APP MOCHA公司創辦人，起初home office寫app，試過三個月食白果無生意，終於靠參加Incu-App計劃進入科學園，先至站穩陣腳。
有idea想寫app，好多人以為單打獨鬥匿埋屋企寫就得。想得到最佳支援，最好參加科學園Incu-App計劃或數碼港培育計劃，無論請人定買器材都有資助，著數好多！兩者申請手續差不多，只要先申請商業登記開公司，然後將app的構思及初步畫面寫成商業計劃書，交俾相關機構，經評審委員會面試，一個月後就可決定能否入園。APP MOCHA的Knuckles及Evan就話：「申請科學園Incu-App計劃，有長達18個月免租期，而且有其他寫app公司做鄰居，得閒可以交換情報，甚至試過傾得成一齊合作。同埋之前試過三個月無生意，入來科學園之後會幫手搵客，收入穩定好多。」No無錢無地方可以考慮home office，但將來點都要搵地方見客，否則好難傾生意！
無論是否識寫app，一個人好難搞得掂介面設計、推廣，而且亦會拖慢進度，所以最好請人。Knuckles及Evan再教路：「近年各大專院校開辦寫app課程，學生要搵實習機會，可以用較平價錢請到人，科學園會幫你手lineup搵院校。」Innopage的Keith就話數碼港的培育計劃，只要聘請近兩年內畢業的大專生，就可獲資助一半人工，慳好多！另外，要留意切勿將程式碼交由一個人負責，最好拆細分給不同程式員，以防有人偷code。NoFingerprint的Dixon話試過在高登等討論區搵人寫app，部分甚至不收分文，「不過質素好參差，同埋未必可以準時交貨，便宜莫貪！」
有人有地方，以為開得工只寫自家app，錯！Keith話點都要接街外job，「寫自家app好難一擊即中，最初寫Innopage電子書app反應都好好，袁彌明同鄒凱光都搵我出電子書，但計完數先知要出到一千本ebook先賺到錢，其間唯有不斷接job，幫其他公司寫app，先有收入撐落去。」初期開價幾萬蚊寫個app，慢慢儲到客先敢加價，最成功要數去年幫Soliton寫app，埋單收七位數字。No不接客，單靠寫自家app，分分鐘零收入，死路一條！
有穩定收入，公司生意上軌道，就可以加大力度開發自家app，Keith話參考Google做法，「鼓勵員工用20%時間做自家app，其餘時間做番客人生意，就不會影響公司的生產力。」Knuckles及Evan仲話：「科學園有齊所有型號的smartphone及tablet，免費供開發者測試，毋須花錢買機，確保app可於所有平台運作得到，不會出街先發現有bugs。」No寫自家app測試得不夠仔細就出街，惹來大量用家負評，公司名聲受損，想翻身都難。
成功debug，無論想更多人用或吸引投資者，都要增加app的曝光率。最簡單可以參加比賽，本地有由香港無線科技商會舉辦的ICT Awards，外地的app比賽更多不勝數，Dixon認為參賽不單為輸贏，「可以乘機將品牌推往外地，亦可測試app在外地是否受落，再加以改良。」No無往外地參賽經驗，最多只能靠本地市場撐起盤生意，除非條橋好掂，否則難賺大錢！
贏比賽出埋名，更易說服投資者，本地有大量投資者配對講座，Keith就試過從中成功找到投資者，「好多公司吹得好大，又話八個月上市，又話點樣可以吸到好多生意，但從投資者角度，最重要是務實，講清楚公司定位、同什麼人合作，以及未來發展策略，感覺到你的誠意，先有人揼錢投資。」
搵到投資者，終於靠app成功搵到第一桶金！
把握機會
玩大富翁，最開心是抽機會卡，有不少著數等緊你。
寫app一樣有各種各樣的機會卡，識得運用，就可以節省大量成本，尤其是個app未識賺錢前，開源最緊要。
機會攻入內地
本地遊戲想打入內地市場，難度頗高，寫「Animal Fighters」及「Farm Dozer」等遊戲的Luduson公司負責人Andrew話，「內地下載手機遊戲途徑多，玩家習慣在遊戲網頁下載，如果想將手機game於內地上架，手續相比擺上App Store及Google Play麻煩得多，建議搵手機遊戲代理商例如香港機匯等組織幫手，代為聯絡及上架，對方雖然會抽佣，但可慳番好多時間。」
機會網台宣傳
任何公司都想有報紙雜誌電視台訪問宣傳，app公司亦不例外，但並非想做就有人接觸，Fingerprint的Dixon就話網台會較易入手，「好似有個叫《五行欠打》的網上節目，好多game迷會上YouTube睇，節目每星期邀請本地game公司做訪問，我上次做完，即刻見到討論區多了討論我們的手機game，仲即時有人download來試玩，最重要是增加到個game的曝光率。」
機會天使講座
數碼港培育計劃定期搞講座，請外地天使投資者來聽本地startup講解公司產品，開發「麻將天下」手機game的WTM總監Derrick認為講座好有用，「每次present完，投資者都會直接指出你的問題，例如上次講完，就話我將遊戲市場定位全球市場好有問題，應該先針對亞洲市場，返去office再調整一下，下次present就更有把握。」Derrick提醒每次不要present完就走人，最好留低同投資者繼續吹水，先掌握到投資者較著重哪些元素。
機會平租伺服器
寫game當然想「親生仔」受歡迎多人玩，但太多人玩又驚伺服器不夠用，買定大量伺服器？錢又未必夠。上月成立的香港機匯服務就幫到手，項目經理施德利解釋：「我們租用亞太衞星數據中心的伺服器，然後再用平價分租俾本地game公司，不單只比市面同類型服務平兩成，仲要月租時租都得！如果玩家流量突然急升，會即時加頻寬給你，之後先計番錢，靈活性大增。」
機會接政府job
接job是app公司成長必經階段，但寫app市場競爭激烈，鬥低價都未必得。APP MOCHA成立短短一年，就接到黃大仙滅罪委員會的app來做，Knuckles及Evan話全因科學園推介，「政府不會貿貿然出街外搵app公司，多數搵科學園介紹，而科學園就會推介Incu-App的公司，想接政府job，參加Incu-App計劃是唯一方法。」
兩大計劃
數碼港培育計劃同埋科學園Incu-App計劃，均會提供資助，俾你請人、搞展覽、去外國參加比賽、租伺服器、印宣傳品等等，最少都有30萬元資助，好使好用。兩者性質分別不大，不過培育計劃無硬性規定要租數碼港，可以選擇方便自己的辦公地點，而且比較多出國的交流計劃，適合有意搵外國投資者的app公司；而Incu-App計劃則與政府及大學有連繫，較易有合作機會，並提供法律顧問服務，有助處理版權等事宜。
最快八堂
寫app可以好有「錢」途，不過，要學幾耐先寫得出？有開設寫app課程的FevaWorks導師Roger Tang，話就算零根底，八堂內都可以寫得出簡單而又實用的app，「例如寫一個香港路面交通實況app，其實只須寫基本的程式碼，讀取番運輸署的實時路況資料同埋直播影片就得，好簡單。」但如果想讓其他駕駛人士即時提供路況資料，又或者俾用家語音通話，就牽涉到伺服器管理，要讀埋相關課程，起碼要多半年時間。另外，好似「Flappy Bird」的閃避遊戲，雖然規則簡單，但始終要畫圖，「要讀埋圖像設計課程，而且亦要用專門開發遊戲的程式編寫，兩者完全不同。」
圖像化學寫
將寫Android app的方法圖像化，完全毋須編寫程式碼，初學者更易掌握。除了有理論教學連結，更提供實例教學，直接跟住寫，更易掌握。 App Inventor中文學習網 網址：http://www.appinventor.tw
一app成名
睇完前面幾個case，本地寫app公司看似前路茫茫，要出盡法寶先能掙扎求存。查實，都有不少成功例子，甚至賺到盆滿鉢滿。
靠網友自拍
曾任職壹傳媒Next Mobile、雅虎等網絡公司的黃雅芬，上年二月推出時裝分享app「Viss」，用戶上載自拍時裝相，並標籤身上衣飾購自何處；而照片下方會有相同或類似款式衣飾的連結，其他用戶睇中，一click就可網購。多得有明星宣傳，現時平均每月都有300萬用戶登入，今年更獲MTV Japan創辦人揼本600多萬元入股。網址：viss.me
威到NBA
本身是軟件程式員兼籃球教練的80後林基偉，在12年創立軟件開發公司 J Plus Corporation Ltd.，開發一隻名為「Basketball Coach's Clipboard」的收費app，供籃球教練協調隊員在比賽期間的走位、傳球等策略安排，上架短短兩年，就合共錄得15萬次下載，威到連NBA華盛頓巫師隊教練也採用，電郵給他建議改善該app功能，上年更由數碼港搭路，成功獲外國天使基金31萬美元（約$241.8萬）注資。網址：http://www.jpluscorp.com
六萬變五億
由科大畢業生曾建中、曾建豪兩兄弟創立的Magic Feature，開業時資金僅六萬元。上年一月推出轉珠遊戲app「神魔之塔」，雖然被指抄襲日本的「Puzzle & Dragons」，但一樣在港台大熱，全球下載量逾一千萬次。本月初被雲遊控股以7,000 萬美元（約$5.46億）收購 21% 股權，升價不止千倍。網址：http://www.towerofsaviors.com