親兄弟相殘的「富豪飯堂」福臨門，經歷三年爭產，終塵埃落定。由五哥徐沛鈞擊退親弟徐維均（七哥），掌管港九兩家店。據知，今次五哥致勝關鍵，是其兒子徐德強找來外援，變相高價買起七哥的股份。後着是將福臨門「唧入」創業板上市公司——華人飲食集團（8272），再於內地大量「複製」福臨門、藉其商標搵真銀。但此着難免令福臨門的質素下降，與其標榜的精細、罕有理念，背道而馳。掌管福臨門的徐德強接受本刊訪問時，還明言即將會把酒家外掛着的「福」字招牌拆去，「呢個福字，喺門外邊，唔係裡邊，風水唔好，要拆！」真正的「自拆招牌」。
繼老牌食府鏞記及蓮香樓等後，歷時三年的福臨門爭奪戰，亦塵埃落定；最終由法官勸諭以價高者得方式競投，上月尾有結果。一直傳聞有「糖王」郭鶴年撐腰的七哥爆冷落敗，「其實糖王當年只係想借福臨門個名，喺內地嘅香格里拉酒店開店，但內地做得一般，只係breakeven，佢都唔再理，更加唔會出錢出力。」落敗的七哥已於月初登報表示全退，港九兩間福臨門經營權，由五哥奪得。與合作多年的親弟分道揚鑣，福臨門將由五哥及其子徐德強一同經營。惟新人事新作風，其中一樣改革，竟然是「拆招牌」。灣仔莊士敦道的福臨門，門口一個圓形的福字，是飯堂標誌。但徐德強笑說：「有老人家睇過，呢個福字，喺門外邊，唔係裡邊，風水唔好，農曆年之後就會拆。」
功勞要人睇到
上週五徐德強接受本刊訪問，透露其掌管福臨門的鴻圖大計。非飲食業出身的他，於美國康乃爾大學應用及管理工程物理學士畢業。畢業後，加入工程顧問公司Anderson Consulting，參與中電及聯交所的改善工作流程等工程，但做了六年，野心大的徐德強不滿足，「你俾咗意見人，人哋又未必執行，自己做咗嘢無人會睇到！」他轉到匯亞集團做私募基金，自言曾替阿里巴巴、安莉芳等公司做投資。之後又曾在上市公司德泰中華（2324，現為首都創投）任主席及執行董事。不過○九年，在德泰中華工作期間，他被指與前執行董事丘忠航作虛假交易、推高當時須配股集資的德泰中華股價，誘使他人認購配股。事件被市場失當行為審裁處罰款百多萬元，並禁止出任上市公司董事或管理層兩年。「其實我當日出去打工，都係吸收經驗，後來返福臨門幫手。」徐德強說。他欲把這盤家族生意企業化，訪問中多次淡化七哥角色的重要性。過往廚房的出品及入貨，一向由七哥負責，但徐德強認為廚房並非「好緊要」：「我希望同大家講，好多人以為做食店，廚師最緊要，其實最緊要係個管理呀。樓面要識得同廚房溝通，啲客人想鹹想淡，伙記要反映意見。就算以前七哥喺度，啲嘢食都唔係七哥落場煮o架。」他暗示一向脾氣火爆的七哥，經常獨斷獨行，不理會食客的要求。徐德強為接棒福臨門磨拳擦掌，「而家我哋嘅方向，唔單只係一間高級食府，賣緊嘅係一個dining experience。」他說今個月將請來一名侍酒師，「之前有個客開咗支八二年嘅Petrus，八萬蚊一支，唔賺酒錢，淨收service charge都已經八千蚊啦。」
現金交數先肯走
五哥及徐德強今次順利投得福臨門，關鍵在找來外援「幫拖」。五哥和七哥分別持有福臨門四成半股權，其餘一成由其他同父異母的姊妹持有；雖然五哥與七哥早已發達，各自手持近兩億物業，福臨門亦年賺四千萬，但要買起七哥手頭股份亦有難度，「福臨門兩個鋪已經值六億，加埋啲海味、現金及商譽，值十幾億o架，要買咗七哥個份，要最少五億元。」一名知情人士指，故徐德強遂在金融市場「融資」。一名有份參與融資的金融界人士說：「有個內地有錢佬，睇中福臨門呢個品牌，有興趣入股，並打算將來喺內地開分店。單deal傾到九成，估計今個月尾就會埋尾成交。」交易會先將福臨門逾四成九股權，暫定以逾六至七億元「唧」入創業板上市公司華人飲食集團，該筆錢正好用來「還七哥條數」，該人士指：「全為現金，否則七哥唔肯走。」華人飲食集團在入主福臨門後，七哥私人持有的四間日本福臨門，以及與郭鶴年合作、在內地的三間福臨門都要改名，而新股東亦會重組公司董事局，變相引入外人主理福臨門。現時，華人飲食集團已停牌，並發出公布，指「訂立一份內容有關認購可換股債券的協議，其構成本公司非常重大收購事項。」
富豪最愛
福臨門的頭號富豪食客，非大劉劉鑾雄莫屬，每次幫襯，門外必有大批保鏢守候。據知，他有一間御用的房間，最愛飲老火湯，吃的菜式，時吃清淡，時而鮑參翅肚，徐德強說，他每月光顧的金額，佔福臨門的營業額約百分之一，估計福臨門每年的營業額約四億，即大劉每年消費約四百萬元，每日平均吃一萬元。能有富豪飯堂的稱號，皆因七十年代開始，已故股聖莫應基、恒生銀行創辦人何添、糖王郭鶴年及東亞銀行主席李國寶等富豪經常光顧，除鮑參翅肚外，他們最喜歡吃的是螺片或切得厚身一點的螺盞。至今，四叔李兆基每年在家中擺十多圍的壽宴，都由福臨門做到會。
籠裡雞作反
華人飲食集團前身是百富國際，本來經營男士內衣褲，○七年股權易手至成衣貿易商人大股東陳婉芬，其間鄭裕彤及四太梁安琪曾以高價接貨，炒起股價，一年間升了七十四倍！曾是炒股中的表表者。現時華人飲食集團市值七千三百多萬元，至去年六月底手持現金一百七十多萬元，主要股東已變為持股兩成三的金利豐主席朱李月華。一一年底華人突然「大展拳腳」，大搞高級食府概念，並於灣仔皇悅酒店地牢開設東海龍王酒家；去年底這店轉為經營米芝蓮一星食店國福樓，據其中期業績表示，他們獲國福樓授權使用其品牌，並聘用國福樓做管理。國福樓的尖沙咀總店，由徐德強老友徐保祿開設，當時全屬福臨門人馬，被指為挑戰福臨門的叛徒，但原來這家店徐德強一直有管理。徐德強承認：「咁當年有班好員工，好似總經理年哥同大廚陳佑良，同七哥意見不合走咗，想留住佢哋，咪開間嘢俾佢哋做。因為當年同七叔打緊官司，所以唔方便公開。」他說開國福樓是要讓客人多個選擇，「就好似點解寶馬又出房車，又出跑車，都係俾客人多個選擇啫！」
包容不了水火不容
福臨門於四八年由兩兄弟的父親徐福全創辦，專做富豪到會。七七年，徐福全去世後，便把福臨門交由二房的兩名兒子，即五哥及七哥合力打理。多年來，五哥負責睇數，七哥負責出品，兩人「一文一武」合力打理。五哥憶述，福臨門最風光的時間，在他心目中，其實在七七年，「嗰時我同阿七、大佬灜鈞，同埋羅安（總廚）四個人一條心，開尖沙咀福臨門，好賺錢，兩年咋，就有錢買咗灣仔店個鋪喇。」不過他與七弟的關係，弄至如斯田地，五哥說：「我哋都互相容忍咗好多年，到而家再包容唔到，迫於無奈解決，而家雙方都滿意。」由家族生意演變成企業生意，五哥說：「要成功就唔可以再係家族生意，總之對公司有利，唔係對個人利益有利就可以。」記者問他不怕被上市公司「蹺起」，他哈哈大笑：「食咗我哋，即係有人睇得起我哋啦，我咪攞錢走囉。」其後，他又補充說：「發展都要一步一步o架！」其子徐德強亦堅持，福臨門一定要擴張，「我爸爸一直想將福臨門呢個品牌繼續傳落去！」他把福臨門與外國零售品牌睇齊，「好似CHANEL同CARTIER咁，要做落去，一係自己上市，一係同其他機構合作，委任最合適嘅人去做行政總裁。」他解釋說：「我哋用一個好高嘅代價買七哥嘅股份，如果只係維持一、兩間店，就唔符合成本效益，一定要發展，咁發展又一定要搵資源嘅﹗」
淪為大家樂
然而福臨門之所以成為「富豪飯堂」，在於其出品夠精細，其總廚羅安說：「我哋啲海虎翅，淨係用條針，一斤發得十四兩；一斤菜，揀最靚個二兩幾俾個客食o架咋。」五哥亦說：「我哋一件貨買返嚟五十蚊，都係賣一百蚊。」因此，其食物成本達五成，比普通餐廳多。另一方面，福臨門亦重視貼身服務，五哥說這裡有一半以上員工都工作十多年以上，他說他最尊重員工，「嗰時政府都未話要搞強積金，我七幾年開始幫啲員工供喇，而家呢個戶口有成千幾萬o架；以前公司團年，我哋喺美心擺，准一個員工帶三個屋企人來。佢哋做得好，做得耐，個個都識得啲客人叫咩名，鍾意啲咩，個個嚟食嘢咪好似返咗屋企咁囉。」這幾年富豪大劉劉鑾雄，亦真的當正福臨門為御用飯堂，日日帶着甘比或呂麗君幫襯。
若然擴張，質素能否保持將成疑問。香港中文大學市場學系教授冼日明認為，高級食肆擴張，一定會賠上質素，他解釋說：「呢類食店，最緊要係個廚師，因為食物質素係跟住個大廚嘅。」而將福臨門與外國零售品牌比較，亦不合適，「CHANEL、CARTIER個設計師設計好一件產品，可以俾工廠大量生產。但高級食府嘅煮食，無可能廚師設計好菜式，再由工廠生產。如果係咁，佢哋嘅食物，只會淪為大家樂、稻香一樣。其實擴張並非無可能，除非福臨門嘅大廚，自己培訓門生，再放落去分店度，不過呢個過程，時間要好長。」
徐德強則指不擔心發展會影響質素，「我知道個平衡點喺邊。就算我哋同人合作，都唔係俾人入嚟指指點點，佢哋要知同緊咩公司合作，福臨門唔係做薄利多銷，you know what you are getting into。」他認為意見不合，最多分手，「以前就係因為大家係一家人，有感情，好多嘢難處理。將來同外人合作，只要先小人後君子，day one白紙黑字寫明合作條件、大家角色，有問題嘅，最多咪break up計數囉！」徐德強說。現時他們與七哥的恩怨，其實仍未了結；○九年五哥告七哥誹謗，五哥要待七哥道歉才妥協；本刊往其加列山道寓所找七哥回應，他找保安驅趕。據知，七哥已在灣仔覓到鋪位，大搞高級食店，屆時將與五哥等人直接對撼。
福臨門鋪值六億
徐沛鈞（五哥）VS 徐維均（七哥）
福臨門由齊心到決裂
名人飯堂 兄弟多反目
鏞記屹立中環七十年的鏞記以燒鵝聞名，創辦人甘穗輝的二房長子甘健成，與弟弟甘琨禮各持有鏞記四成半股份，餘下一成由其妹甘美玲持有。惟甘美玲把其中一成股權轉移予甘琨禮。成為大股東的甘琨禮委任其兒子出任公司董事，削弱甘健成在鏞記的話事權。甘健成遂於一○年入稟把鏞記清盤。去年十月官司未完，甘健成因病去世，最終高院判甘琨禮勝訴。蓮香樓開業近九十年的舊式茶樓蓮香樓，股權由顏氏第二代志人及同珍共同持有四成八股份，其餘分散給各房兄弟，原意想蓮香樓世代相傳。但兩兄弟生前訂明，較先過身一方的股份將由健在一方承接。同珍於○六年較志人先過身，同珍兒子顏尊輝為此早謀後路，未向其他股東稟報，便自行於○九年在上環開設格局、點心款式近乎一樣的蓮香居，但同年遭志人的後人控告其冒名影射。其後，法庭指指控不成立，訴訟已被剔除。