扶乩與貼士 左丁山

以前好似講過，某年某月某日揸車自中大崇基學院出大埔道，竟然見到一群身穿道袍，道士模樣，內地人模樣嘅男士結隊行出校門，點解中大有咁多道士呢，後來問嚇一位知情人士，佢話中大宗教系有不同之宗教研究所，只欠伊斯蘭教，而每個宗教研究所都有團體捐助，其中一個專門研究道教。內地道觀在文革時慘受迫害，最慘者文物無存，道士星散，最近二十年始慢慢恢復，於是內地不時有啲道士到中大受訓，學習番啲道教道統。
中大有個「道教文化研究中心」，主任黎志添教授係中大畢業生，芝加哥大學博士，本身係天主教徒，但對研究道教非常有興趣，成為道教學理禮儀風俗專家。呢個研究所有一本書叫做「香港道教與扶乩信仰」，交由中大出版社在2013年出版，作者係日本人志賀市子，築波大學人類學博士，專門研究中國華南地區道教與民間信仰，原文以日文寫成，1999年在東京出版，現由宋軍譯成中文，譯者在中國社會科學院長期研究明清宗教結社歷史，基督教會史。作者在90年代在香港實地考察，蒐集大量現實資料寫成本書。
道教扶乩好似幾神秘，左丁山兒童時代就聽過先父講古仔，指在1936年南天王陳濟棠密謀起兵反抗蔣介石，事先聽謀臣意見，搵道士扶乩，請呂洞賓先師指點，得四個大字，「機不可失」，於是大喜過望，以「抗日救國軍」名義宣佈反蔣，殊不知蔣介石早已收買咗陳濟棠手下空軍大將，司令帶48架飛機飛咗去南京投奔，陳濟棠唯有倉皇出走香港。先父話「機不可失」呢四個字，靈到十足十，只不過凡人不懂解讀其真意而已。
扶乩如此神奇？中大呢本書探究扶乩的性質、香港的巫術與扶乩，寫得幾過癮，可以揭開扶乩之神秘面紗。講到香港民間扶乩，唔知志賀市子博士與黎志添教授有冇研究過歷史悠久嘅「老五馬經」（左丁山之啟蒙馬經，未入讀小學已經跟先父閱讀老五），呢份馬經六十年來有一個全港馬經所無嘅特色，就係有扶乩貼士，由一位「在心齋主」每次賽馬前為老五扶乩，所得文字刊於老五。扶乩貼士似係燈謎，對中文及中國歷史人物認識少啲都唔易睇得明白。扶乩貼士是否有用？唔敢講，但能在老五馬經存在數十年，必有道理，黎教授等人不妨今日就買一份老五嚟研究，睇嚇可唔可以領悟今晚邊隻馬會爆冷！