CEPA無大好處 左丁山

特區政府與內地簽訂CEPA補充協議10，即第十份補充協議，自2003年起計，平均每年一補充，簽約十年，究竟對香港經濟有乜影響？經濟師Ｌ話香港得益甚微，難以計數，但總係有好過冇，有CEPA好過冇CEPA，雖說內地開了大門，省市小門未開，但既然開咗大門，香港工商界，專業界總可以行入去碰一碰吖。
問嚇工業家、證券商、測量師、律師，所得答案基本相同，就係十年來無大得益，本地證券商直情搖曬頭㖭。律師就話有不同律師事務所在內地開設咗五十幾個辦事處，應該有啲生意嘅，冇大茶飯食箒。
根據新補充協議，本港註冊券商，即港資券商可在廣州、北京、上海開設三家合資證券行，港資可佔股本51%，握有控制權。咦，若在穗京滬每地開設一間合資行，可以博嚇噃，守得雲開見月明嘅箒。點知資深證券商Ｓ君話：「左丁山，你解讀錯了，據我嘅政府消息人士講，穗京滬各設一家嘅意思其實係指每地只能有一間港資券商，舉個假設例子，假如東亞在廣州，恆生在北京、匯豐在上海各自開辦一間合資證券公司，咁就已經滿額，其他香港金融機構冇得玩。總之係先到先得」！
嚇，咁樣叫做三地三間，限制好嚴噃，本地港資中小企券商咪肯定冇希望，Ｓ君話：「魔鬼在細節裡，政府應該老早講得清楚明白，唔好等我地空歡喜一場至啱！」
律師Ｌ講到法律事務所嗰瓣，話本地資本律師樓可到廣東省一省開業，最少要有註冊資本一千萬，開業後可與當地（例如廣州）一間中國律師樓合作，由對方派一名律師過嚟負責執行中國內地法律事務，本港律師不能處理內地法律案件，雖然冇乜肉食，相信本港都會有律師事務所到廣州展開破冰之旅嘅事務，希望遲啲可以到上海、北京照辦煮碗吖嘛。如果此乃趨勢，本港律師非加緊學習中文不可，律師Ｌ話：「直情係啦，只識英文嘅律師，以後怕幾難在本地律師樓搵到工，我地請人講到明係要懂得中英雙語嘅律師，但不少律師多數英文掂，中文唔得，尤其是國際學校出身嗰批，佢地要自己想嚇辦法咯！」