和黃負債 左丁山

有一位女讀者來郵，問及投資和黃好唔好，佢手上持有和黃股票有一段時間咯。呢啲問題俾陸叔或者青姐回答應該更好，況且左丁山並非股評專家，驚住答錯噃，所以冇意思回應。點知前星期有一位老友睇完林本利在蘋果寫「和黃負債過萬億，出售百佳減債」，猛咁問左丁山點睇。原來佢又係和黃股東，仲熱心到送一本和黃2012年年報到左丁山寫字樓，務要左丁山對佢講兩句。左丁山第一個反應係：倘若和黃負債過萬億，出售百佳可以取回幾多百億呀？用嚟還債亦不會對大局有影響嘅箒，第二個反應就係，既然送來年報，不如學人睇真啲先至講嘢。
既然有人話「和黃負債過萬億」，首先自2012年年報睇負債，盤數由畢馬威做核數師，第148頁綜合財務狀況表列出流動負債1209億，非流動負債2444億（按：四捨五入），加埋總負債就係3653億，相等於總資產8039億之45.4%，即係話資產淨值有4386億，大於負債。短期（一年內）周轉嚟講，流動資產減去流動負債，係正數，流動資產淨值係684億，流動比率（current ratio）係1.57，唔算曳。
點解有人講和黃有一萬億負債之說呢？原來第192頁刊載聯營公司（控股權在50%以下）有總負債6087億，第194頁合資企業有總負債1833億，於是將3653億加6087億加1833億就等於11573億元，過萬億負債由此而來。但且慢，如果要將聯營公司及合資企業嘅負債都當埋係和黃嘅負債（其實核數師一定會考慮晒所有會計法規及原則先至唔加埋），聯營公司及合資企業之純利及資產亦應加埋晒嚟計，如果咁樣做，和黃之總資產就會膨脹到21336億，係前述總負債11573億之1.84倍（負債資產比率54.2%），唔駛驚噃。老實講，和黃負債過萬億之說並不成立，讀過會計學就知道不能如此計算，唔好當畢馬威班會計師係儍仔儍女。從業務狀態講，和黃之海外收益大於香港收益，生意遍佈全球，係世界上第一間由華人控制之跨國大型企業（multinational conglomerate），呢類公司嘅股價不會突然爆升，買呢隻股票要講耐性，以八月二十八日收市價89.6元計，市盈率14.6倍，市賬率1.04倍，息率2.38%，不過不失咁啦！