2013-07-18 NM
地產代理反印花稅雙辣招，上街遊行㷫烚烚。
無殼蝸牛看在眼內，心裡陣陣涼。 正是「有咁耐風流，有咁耐折墮」。牽頭帶隊的施永青，更是人人喊打。
「我上街，係幫啲經紀，又唔係等佣金開飯。」他五行欠揍，除了因為借樓市炒風而盆滿鉢滿，更因為他過去的言論：「買唔到樓係你無能」、「在香港撈唔掂，點解唔北上」等等。自詡信奉適者生存，如今要求政府出手，豈不是打倒昨日的我？「損害到行業利益，我嗌吓痛都得啩？」
有錢人總是立於不敗之地。施永青認為「香港冇地產霸權」、「人哋租間鋪俾名牌、唔租俾雲吞麵，你就阿支阿左，不如叫黨委書記規定邊間鋪賣乜」。今日事事訴諸「市場定律」，但施永青曾是馬克思主義的忠實信徒。
另一邊廂，他早已捐盡中原的股份，全心投入「三次分配」的事業。
「人當然有理想，不過唔通同你講？理想係同紅顏知己講，同《壹週刊》讀者講理想咩？」差在沒有哼一聲。
記者痛恨自己不是施永青的紅顏知己，不然以下四頁的內容應該會精彩一點。「我本來對記者都好open，整整吓都豎起隻槓。你哋選過我做咩『最難頂紅人』，又冇咩標準，自己話係就係，我又冇報名，完全唔理其他人感受！你有冇發現愈來愈少人肯同你做訪問？」這訪問差點便因為他永遠的紅顏知己——施太而告吹。「我老婆叫我唔好接受訪問。點解要同人講屋企嘢？睇見就眼寃，成日曝光唔知醜。」他有兩女一子，均已成年：「個仔都唔鍾意。俾朋友見到，話呢個係你老豆？烚熟狗頭咁。」記者答應施永青不問候他的家人，反正人人都知他懼內。「你是抬了上轎先算吧。」事實上，他酷愛發表意見，無論是報紙電視電台，施永青都音容常在。
時間回到七月七日，N個地產代理組織、加上中原和美聯兩大巨頭齊齊上街，是為「辣招苦主大遊行」。地產經紀最是勇武，為爭客而群毆、「中美」大戰時常上演，這天卻異常團結。大會估計人數逾二萬，警方話最多五千五。遊行隊伍有點像「十個救火的少年」——有人中途走入茶餐廳吹水、也有人「順便」到新盤溱林的展銷廳拉客。正如施永青所說：「地產代理你使得佢郁？我出糧俾佢，都指佢唔郁呀。」翌日他走上港台《千禧年代》，被聽眾痛罵，「地產代理不學無術，但抽佣仲貴過律師費」，施永青笑咪咪的回敬：「點會搵得多過律師？代理成日食檸檬，大部分人都係走投無路先做代理咋。」
何不食肉糜
說來淒涼，香港有36,000名地產代理，在印花稅雙辣招下，現時每個月的物業成交量跌至四千多宗，平均十名經紀爭一單生意。大多數代理以最低工資吊命，但日曬雨淋又「辛苦過做看更」。若政府不撤招，將有二萬人失業云云。幸好香港現時的失業率僅為3.5%，以往施永青經常勉勵年輕人要自強不息，「只要你跑贏四個人就有工做，咁都唔肯努力？」現時洗大餅的月薪萬二，扎鐵日薪千七，都很難請人。代理們很快可以在自由市場上另謀高就吧？正如他在碼頭工潮期間，也在《am730》的專欄中勸諭碼頭工人應及早學習新技能。「轉行唔係簡單的選擇，代理都係要經驗累積，先可以了解特定市場和屋苑的資料、累積客戶，一轉咪前功盡廢？唔好話轉行，轉區都唔易。」
唔轉行，就得繼續發功逼政府讓步，好讓樓繼續炒。「雙辣招」是指分別在去年十月和今年二月推出的「買家印花稅」（BSD）、及「雙倍印花稅」（DSD）。前者針對公司和外地人，後者令買第二層樓的要付雙倍印花稅。雙劍合璧，大陸豪客和本地炒家齊齊絕跡。施永青的如意算盤是取消DSD、股東全是本地人的公司可豁免BSD。遊行過後，他認為己方形勢大好：「（政府）雖然都係話唔撤，但加咗句『當市場回復正常時，就會撤銷或調整』，即係俾番少少希望你，叫你唔好咁嬲啦。」他估計快則一年、慢則兩年，辣招始終會撤，總之：「妓女係最古老的行業，經紀都係。我哋唔會式微的。」
關於磚頭，施永青滿腹經綸，具體過施政報告。他主張「自住優先」，新推出的土地，規定部分單位只可售予首次置業人士，日後也只可轉售予無殼蝸牛，成為「變種居屋」。紓緩了社會情緒、樓價也應聲下跌。照顧了民生需求，就可以容許外來資金買樓云云：「梁振英而家幫美國救市之嘛。去年中國流出國外的資金達一千億，本來香港都有着數o架。」地產商有着數？「小業主都係高地價政策得益者。」但過去十年，樓價狂飆，房子卻愈嚟愈細。紙上富貴只能留待退休時造逆按揭。梁振英有冇向你討教？「你問有冇諮詢『我哋』，咁蔡涯棉都係行家啦。」他愛捉字蝨，做不成梁粉，也可以一齊研究語言偽術。
社會主義青年
施永青多次強調自己是保守派，「你話我係建制派都得。」左翼不比左髀，冇肉食。他旗下的《am730》偏左，令他沒胃口，「我唔認為係好吸引我嘅報紙。」卻堅持不過問編採。很難想像他與長毛曾是同道中人，六七暴動時曾上街掟石。他老家在上海，爸爸是一間出入口公司的小職員。四九年後，該公司遷往香港，施氏一家也跟着南下，住在長沙灣永康街。所謂員工宿舍其實是貨倉上的僭建物，火柴盒般的一家一房。小六時，思想左傾的鄰居決定返大陸，建設新中國，留下了雜物若干。當中有恩格斯以問答形式寫成的《共產主義原理》，細路竟看得津津有味。當中一句「奴隸是一次過出賣自己，工人是分時段出賣自己」，如醍醐灌頂，從此成為稚齡左仔。
中學階段，他辦讀書會、看馬列毛的著作、組織「群眾鬥爭」。白日夢做得多，學校的專橫刻板，更令施永青發癲。他好學，但鄙視考試，成績欠佳。中五畢業後，在左派重生中學教工人夜校，不同年齡、不同程度的學生混雜其中。月薪三百五，而當時的工廠妹能賺六、七百。窮到燶、一腳踢。校內的桌椅木工、泥水電工他都一手包辦。八年抗戰，異常刻苦，卻甘之如飴。但一九七六年的四五運動流血告終，令他理想幻滅。「搞革命的政黨竟然鎮壓人民。」從此投奔資本主義的世界，兩年後他創辦中原地產。
今天跟他談地產霸權，他反問：「霸權係咩意思？蝦蝦霸霸為之霸權。但地產商玩嘅係社會認可、自由市場的遊戲喎。」是以在二○一一年反對新世界興建屏風樓的美孚居民，是刁民。「都證明唔到你有業權，又走去圍人啲地盤，仲去圍周大福。冇錯，鄭裕彤係有份，但都有其他小股東嘛。好似大陸以前咁，你有個姨媽喺台灣又話你係特務？咁鬥地主都得啦！呢啲先係霸權。」
政府以公私合營發展東北新市鎮，令地產商囤積多年的土地變得奇貨可居，亦令僅餘的農戶被逼遷。「要改善香港人的生活環境，一定要起多啲樓。以復耕來拒絕收地，係多餘。我都鍾意耕田，但嗰啲係園藝之嘛，你估佢真係做農夫？香港有幾多條件復耕？恢復農業，GDP必然大跌。」收回粉嶺的高爾夫球場來起樓、取代東北新市鎮，又如何？「我係環保人士，打golf唔值得鼓勵。但都未至於要起好都拆咗佢。其實打網球都嘥o架，一場得四個人打，都咁鬼大塊地，最好打乒乓波。」
佔中咪搞
施永青「想快啲有民主」，卻對佔領中環大潑冷水。上街抗爭都要睇對手，若對方是共產黨，就唔好制。「我睇唔到中央會放棄對香港的主權。」他擔心若堅持摒棄提名委員會，即是將《基本法》推倒：「八十年代中的時候，大陸對香港倚賴。所以先會接受這樣的《中英聯合聲明》。而家由頭來過，係咪會爭取到更好的？」寧願在篩選候選人上爭取多點空間，「大陸可接受的人，都有一個光譜，唔係淨係得梁振英A、B、C。」
一方面，他覺得佔中的力度有限，「要改變，就要佔領中南海，仲要係武裝佔領。」另一方面，他又怕佔中太激，嚇怕中央，連偷雞突圍的機會也被抹殺：「細個時我想阿媽放我出街玩，就扮乖，呢個係權宜。你話當阿媽死嘅就話啫，但你仲要返屋企食飯嘛。」
事實上，施永青的鬥爭經驗豐富。六七年，他在新法書院讀中四。學校在大球場搞活動，規定每個學生要包銷若干門票。他認為學店刮槓，發動同學不予合作。結果校方將拒絕包銷的學生逐個擊破，施永青則被借故踢出校。為報復，他與支持者策動了一次以校長為目標的「恐怖襲擊」。把炮仗掛在學校天台，以一支香遙控。待放學時，同學在操場四散，便引爆炮仗，寫着「打倒黃老闆」的橫額應聲彈出，大量傳單像雪片般四散，非常壯觀。
至於理想，他雖然覺得跟敝刊讀者分享是「自討沒趣」，卻又忍唔住透露一二：「好簡單，當一個人累積的財富超越消耗時，做乜仲要累積財富？錢用來做咩好？當然係用在最有需要的地方。」他名下的慈善基金，在大陸農村做小額貸款、搞合作社、修橋補路打井，是為「三次分配」。但貪污不曾令你卻步？「你哋嘅傳媒只報導負面的，顯微鏡對住粒癦梗係黑色啦。」那何謂「二次分配」，則是指由政府主導的社會福利，他不主張，因為官僚效率低。
他雖然早已淡出中原的日常業務，但每日仍準時返回新世界大廈的辦公室。無論是中原或地產行業有任何風吹草動，傳媒仍愛以他為反應堆。訪問翌日他飛往北京開會，處理其慈善基金的事宜。研究二百多個項目當中有沒有「癦屎」，也要金睛火眼。
沒有改變的，除了他包拗頸的性格，還有無為而治、分享勞動成果的信念。「職工盟只爭取最低工資，太冇出息了。」無論是中原還是《am730》，他都把三分一的利潤作花紅，身體力行作「一次分配」：「中原係咁，美聯唔敢唔跟。其他傳媒唔跟，係因為《am730》做得唔夠好。黎智英初頭都有分紅，分分鐘唔知係咪冇錢賺、分少啲。如果佢都一樣咁大方，人人都跟啦，唔係請唔到人。」