魏華星有個朵——「社企之父」。他並非行內先驅，但顛覆了社企的生存方式及價值。一般人眼中，大商家要「賺到錢」，社企則等同做慈善，魏華星要「兩者兼得」。曾為電盈助理副總裁，他無法改變老闆的貪婪，選擇「炒老細魷魚」，轉投社企。學以致用，他用商業手法來經營社企，將其當成一盤生意，要幫人亦要賺錢。這六年，魏華星創立香港社會創投基金，先後開發十多間社企，投資者包括夏佳理、陳智思及蔡東豪等。魏華星說：「以商業手法去解決社會問題，係一個更公平嘅遊戲！」這亦是一個中年父親心中的「烏托邦」﹕「我想話俾仔女知，有夢就要追，唔好等到七老八十。」
魏華星簡歷
年齡：四十一歲
職位：香港社會創投基金創辦人兼行政總裁
家庭：已婚，育有一子一女
1994年：畢業於城市大學工商數量分析系
1996年：於屈臣氏集團（香港）擔任助理品牌經理
2000年：出任電訊盈科助理副總裁
2007年：辭職後成立創投基金
2011年：獲選香港十大傑青
2013年：參加北極馬拉松，成為首名衝線的香港選手
第一次碰面，魏華星受記者所託，到大圍的露天街市，與蝕錢的地踎茶餐廳老闆娘雁姐見面，交流生意經。一身恤衫西褲的他，說起話來陰聲細氣，卻與粗豪硬朗的雁姐，言談甚歡。
魏華星自稱社企家，但更像一名商人，他經營的是一盤另類的生意。與聲嘶力竭﹑為低下層爭取權益的扶貧鬥士不同，他的語調永遠都是冷靜平和的﹕「社企唔係非牟利機構，我哋係商業元素同社會元素並行，以商業手法去解決社會問題。」非牟利機構靠政府資金營運，而社企須自負盈虧。魏華星認為幫人和賺錢，沒有衝突。
「搭橋」搵金主
魏華星喜歡做生意，「以前打工，只係一味幫有錢人賺更多錢，雖然放假時會做義工，但慢慢自己都覺得好分裂。」魏華星提早從電盈退休，並成立香港社會創投基金，變身「基金經理」。
由他牽頭的基金，第一期籌集的資金﹑連同他的幾十萬元退休金，約有五百萬。兩年來，先後投資了十二個社企項目，包括「黑暗中對話」（DiD），以及幫劏房戶租房的「光房」計劃等。其實，他的角色更像一個「搭橋者」，一方面找「金主」入股基金，另一方面物色值得投資的社企項目。八個篩選原則中，商業目標及社會目標各佔一半，魏華星強調﹕「要睇吓個申請係針對咩社會問題，夠唔夠創新，再搵員工落去做一排，最後先決定投資幾多錢。」
現在，十二個社企項目，有一半可自負盈虧。其中，基金有份投資﹑最賺錢的王牌項目「黑暗中對話」，每年有約五萬人入場。現設於美孚的「黑暗中對話」體驗館，源於德國，會場內設多個漆黑的房間，顧客由視障員工帶領，在房內活動，讓他們體驗盲人生活。入場費每位百多元，包場生日會位位二百五，連同DiD提供的行政人員工作坊，是主要財路。「DiD係一個里程碑，做起咗個品牌，同人傾其他嘢都易啲，唔少企業主動叫我哋安排工作坊作團隊訓練。」既是生意，勢好當然食住上，魏華星續道﹕「之後延伸出暗中夜宴及暗中作樂等節目，好多商業機構樂意贊助，媒體主動來報導，慳番唔少宣傳費。」
槓桿理論以小博大
比起商業機構，社企的資源更緊張，每花一分一毫都要「諗過度過」。「除了花心思去創新，更要以小博大。」魏華星將商界的槓桿理論，用在社企內，「你俾一蚊我哋，我有專業義工網絡幫手，慳番嘅成本，變相可以當三、四蚊用。項目開始後，我再搵到其他人投資，由開始時的一蚊，到最後可能有八蚊！」目標是，每一個項目都可以持續經營，不是把錢燒光就結束。他笑說﹕「更理想是，我哋最後可以賣出股份，拎番嚿錢來投資其他項目。」
出錢亦出力，在商界「學藝」十五年，兼是「三十會」成員，他有很多商界朋友。他笑言，今次碌盡人情卡；其中找業主平租物業給劏房戶、並賺取「中介費」的「光房」社企項目，便有朋友「幫拖」，「好多朋友都俾我拖落水，好似李律仁大律師咁，因為光房嘅租約較特別，佢花好多時間睇有關法律文件。大家都做上癮，覺得得到嘅遠比付出多。」魏華星得意道。
不做遮醜布
創投基金第一期的投資者，包括夏佳理及陳智思等，出資一百萬元的陳智思笑言，這是一筆有風險的投資，因為認同魏華星以商業手法解決社會問題的理念而「去馬」，他解釋﹕「社會上好難搵到人肯去試偏門嘢，佢辭咗份工去做，咁有熱誠，背後又有一班專業人士支持，應該可以成功。我唔會睇回報，就算有，都會擺番入去當投資。」現時部分社企有錢賺，會派錢給相關股東；通常股東會把派息放回項目再投資。現正籌集第二個五百萬的魏華星強調，不會為錢哈腰求人。「無論係我哋同投資者，定係我哋同受助者嘅關係，都要平等及互相尊重。」以往，慈善是由上而下，靠的是同情心，但魏指基金只是在受助者旁邊扶他一把，靠的是「同理心」。
今天，魏華星仍在商界打滾，爭取不同公司的贊助，但他否認基金成為商業機構的遮醜布。平日語調平和的他，突然激動道﹕「我哋唔應該睇對立面，而係要搵合作嘅可能性。」他舉例說：「有公司曾將佢哋無咁靚、但質素良好嘅貨物，拎出嚟平賣俾基層。佢哋無蝕，只係賺少咗啫！」
基層的希望
投身社企，不只是換工作，而是全家生活的改變。辭職前，魏華星是電訊盈科助理副總裁，主責內地策略拓展。妻子是公務員，生活尚算無憂。○六年，大女出世。做人父母，應更落力搵「奶粉錢」，魏華星卻決定辭職。「個女出世前，睇好多書，學習點樣教育小朋友，但最後我覺得身教先係最有效嘅。」他的瘋狂得到妻子支持，「可能因為我哋係做義工識嘅。」魏華星笑指﹕「我同太太生活都好樸素，唔想俾太好嘅生活啲小朋友。佢哋歎慣咗，第日自己搵唔番只會唔開心。」不論是社企的受助者，甚至自己的孩子，他都只會扶一把，最終希望他們都能靠自己。
今日，魏華星沒再租樓住，反而住在家人名下的觀塘舊居屋，出入搭巴士，子女讀的是油麻地的津貼小學。他的價值觀是，與其留層樓予子女，不如教他們要有希望和自己的夢想，他堅定地說﹕「如果我哋呢一代都無希望，等於教下一代自毀！」